ORANJSTAD, Aruba: Comision di Piscina Rolly Bislik y Piscina San Nicolas a reuni cu Notario Yarzagaray, Fundacion Facilidadnan Deportivo (FFD) y companianan cu a bid pa haci e renobacion riba Piscina Rolly Bislik. E companianan a entrega e documentonan necesario, pero tambe a entrega nan proposicion di ehecuta e proyecto aki. Representante di Notario Yarzagaray a controla tur papel ta na ordo di e 5 companianan cu a bid.
Miembro di directiva di piscina di Rolly Bislik y Piscina San Nicolas, Gerald Franca a splica cu nan a entrega e trabou di e destaho publico na Ing. Juni Tromp, kende ta encarga cu FFD. El a hiba e trabou cerca ACE Engineering, cu na su turno a haci analisis di e trabounan cu mester haci riba e facilidad. Desde aña pasa e comision a ricibi tur specificacion for di WEB y di e compania cu a traha e proyecto pa nan. A base di esey ACE Consultant a traha e peticion pa mira kico mester haci riba e piscinanan.
E piscinanan tin di ricibi nan mantenemento, pasobra e tempo necesario a pasa y tin cierto trabounan cu mester haci den e pump huis, riba e tuberianan. Tambe tin cu bin extra trabou eyden y haci esaki un tiki mas competitivo. E pool mester keda na nivel di FINA, esta Federacion Internacional di Landamento.
Awor cu e companianan interesa a entrega nan proposicion diamars mainta den e destaho, lo mester studia e bidnan debidamente y lo haci esaki den presencia di notario y ACE Engineering. Nan lo mester tuma e decision final pa asina financia e proyecto y completa mas pronto posibel. Tin hopi peticion local como internacional ta drentando, pero tambe di e area di Caribe pa competencianan. Pe motibo aki e comision di piscina mester cumpli cu tur rekisito cu nan ta exigi. “Nos ta contento cu e trabou haci y mare nan por cuminsa mañan mes”, Gerald Franca a indica.
E compania ACE Engineering ta encarga pa supervisa e destaho di 5 compania y diamars mainta tabatin e destaho publico pe piscina olimpico. Consulting Engineer di ACE Engineering, Reigène Geerman a splica cu nan a haci e prome “scope of work”, cual ta e parti tecnico di dje. Hunto cu esey a bin e parti di destaho publico y e notario publicamente a habri e biddingnan di e companianan cu a participa. Awo cu nan a ricibi tur papel, unda cu nan lo sinta na mesa pa evalua tur proposicion. Aki lo mira riba e parti tecnico y economico, pa asina mira cua ta esun mas visibel y optimal pa FFD.
E companianan cu a entrega bid ta Crystel Pool Services N.V., Mack’s Total Quality Services N.V., Emeco Aruba N.V., C&D Consultant & Development N.V. y Willy’s Pool Services & Supplies N.V. ACE Engineering ta premira cu e proceso di trabou ehecuta lo dura 6 pa 8 luna. Pa loke ta e proceso di evaluacion, ta premira cu esaki lo dura entre 2 pa 3 siman pa por tuma un decision final.