129
STA. CRUZ — Lider di MEP Evelyn Wever-Croes, den un entrevista diabierna ultimo, a duna di conose cu si bo interpreta e veredicto di pueblo bon, bo por saca algun conclusion importante.
“Pueblo a rechasa corupcion y kier mira un gobierno integro y transparente.
Tambe un gobierno cu ta traha a base innovativo y prepara nos economia y enseñansa pa futuro.
Y probablemente e mas importante: pueblo a vota pa pone e ser humano central atrobe.
Basa riba e principionan aki nos di MEP lo drenta e negosacionnan cu partidonan POR y RED pa por yega na un base mas amplio, cu por brinda un gobernacion stabil pa e sigiente 4 añanan.
Nos ta haya conseho di hopi hende, y nos ta aprecia tur e consehonan y nos lo purba tene cuenta mas tanto posibel cu nan. Pasobra na fin di dia ta un gobierno pa pueblo nos kier brinda.
Y den e proceso aki naturalmente como lider di MEP mi lo consulta cu nos directivanan, nos presidentenan, nos lidernan di bario y nos votadornan.
Nos ta wardando pa e informador wordo nombra, pa nos reuni cun’e y asina cuminsa e fase di sinta oficialmente na mesa cu partidonan POR y RED riba formacion.
Locual mi ta lamenta ta cu oponentenan politico cada dia ta inventa cantidad di rumor cu e unico intencion pa frustra e intentonan pa nos forma un coalicion. Nan no kier un otro gobierno, pasobra nan tin miedo di investigacion. Pero nan tambe mester compronde cu pueblo a papia cla y pueblo a rechasa e forma di intimidacion y manipulacion cu nan ta hiba campaña. Pesey tambe mi a pidi un investigacion na e instigacion di prome minister Mike Eman y presidente di parlamento Mervin Wyatt-Ras, pasobra instiga hende pa actua contra autoridad ta un crimen cu tin 5 aña castigo riba dje.
Mi ta hasi un apelacion na un y tur pa nos keda calmo, cu cabes friew. Esaki ta un proceso cu ta relativamente nobo pa Aruba, y nos mester tuma nos tempo pa hasi’e bon. Cu poder di Dios nos lo logra y nos lo por brinda Aruba un bon gobierno”, palabranan di Evelyn Wever-Croes, lider di MEP.