Home Politics Robert Candelaria, candidato # 7 di AVP: Ta yama su votadonan Danki...

Robert Candelaria, candidato # 7 di AVP: Ta yama su votadonan Danki di curason pa e sosten

SHARE

ORANJESTAD, Aruba: “Mi ta masha orguyoso y humildemente mi ta yama danki na tur cu a sostene mi den e campaña electoral aki. Tabata algo nobo pa mi, mi a siña hopi. Mi ta cla pa sirbi e pais aki cu a brinda mi asina tanto oportunidad den mi bida”, asina Robert Candelaria, kende tabata candidato # 7 riba lista di AVP a duna di conoce.

 

E ta consciente cu e tabatin apenas algun siman pa campaña, topa cu posibel votadonan, conta di su vision y plannan, pero asina mes a logra. Awor e intencion ta pa sigui sirbi su pais, den cualkier forma. Pasobra si no tabata pa Aruba e no ta awe ken e ta. E ta yiu di un mama di Aruba. Su wela Chichi, que en pas descanse, Marianita Paskel cu hopi conoce tabata biba den Sweelinkstraat, tabata un sirbido di tur hende y alabes un miembro activo di AVP. Su casa ta bini di famia Davelaar di Aruba. Dos di su yiunan a nace aki na Aruba y un na Hulanda.

 

Robert Candelaria a bira Polis pasobra di ora e tabatin tino y a siña papia el a bisa cu e kier bira Polis. Ora el a cuminsa su carera policial despues di su estudio na NPA na Apeldoorn, ta na Aruba el a cuminsa. Aki el a traha cu hopi di e Polisnan cu ya a baha cu pensioen of ya no ta hunto cu nos mas. Di nan el a siña kico ta nifica pa sirbi bo pais. Diploma ta un cos, pero siña di experencia di esunnan mas grandi cu bo ta “priceless”. Despues di a traha y crece den Cuerpo Policial el a wordo acerca pa sigui cu su carera profesional den un empresa priva aki na Aruba. E mesun empresa aki a pidi’e pa sigui traha cu nan na Corsou.

 

Den su carera el a siña con Gobierno ta funciona, pero tambe con empresanan priva ta funciona. Pues, e ta compronde e idioma di Gobierno, pero tambe e idioma pafo di Gobierno hopi bon.

 

Awor cu tur loke el a siña y tur e experencia cu el a haya, e ta facil pa keda sinta na canto y duna comentario riba esunnan riba veld. E mester a pensa hopi pa tuma e paso pa e tambe subi veld. E no tabata un decision facil, pero el a tume, pasobra e ta kere cu ta riba veld so ta gana wega. E kier duna bek na e pais cu a duna asina tanto na dje. E ta cla pa sigui sirbi e pais cu a dune su mama, su casa, su yiunan, pero tambe su famia grandi Paskel y Heronimo, su amigonan y coleganan, y tur su rumannan den Cristo.