ORANJESTAD, Aruba: Minister di Husticia, mr. drs. Arthur Dowers a tene un bishita na Cuerpo di Bombero, unda cu awo tin 3 officier cu a gradua na Corsou y nan a bin verstrek Cuerpo di Bombero. A duna oportunidad na esunnan cu ta traha den Cuerpo di Bombero pa nan por sigui crece y door di esaki awo tin un capacidad mas grandi pa duna liderazgo na e organisacion. E organisacion mester crece pa bira uno cu lo traha mas “self supporting”.
E mandatario a bisa cu nan kier bay mira pa bin mas entrada for di e servicio aki, pasobra nan ta haci hopi trabou pa diferente gruponan den comunidad y comercio. E trabounan ta aki nan ta haci’e completamente gratis y ta kere cu pa futuro lo mester bin cambio. Ministerio di Husticia kier aumenta e parti di prevencion, di cual na Cuerpo di Bombero ta haciendo un bon trabou pe parti di prevencion di candela, e parti di complicacion cu klapchi. Tin comision di klapchi y Cuerpo di Bombero ta forma parti di esaki y e trabou haci den dje ta di nivel sumamente halto.
Mester bin algun pasonan pa garantisa e desaroyo di Cuerpo di Bombero lo bay conoce unicamente adelanto. Den pasado tabatin situacionnan cu no tabata inverti den Cuerpo di Bombero y esaki a pone cu tabatin retraso grandi y mester a pone hopi miyon disponibel di biaha. Esey ta nifica cu cada bes mester cumpra material na mes momento y no tin un bon plan pa reemplasa e cosnan aki. Esaki ta cosnan cu mester introduci awo, tambe mester introduci oportunidad pa nos hendenan por haya trainingnan cu nan mester localmente y tambe pafo di Aruba, asina Minister Dowers a indica.
Mester tin un presupuesto pa esey y tambe mester garantisa pa esunnan cu ta haci mas tanto uzo di e servicio. Mester garantisa e funcionamento por ehempel di aeropuerto door di e facilidad di Cuerpo di Bombero. Tin discusionnan riba esaki y e mandatario ta spera cu riba un periodo cortico por yega na un palabracion pe contribucion aki bini. Lo mester por garantisa cu cualkier momento Cuerpo Policial mester di cualkier herment, por cumpra esaki mesora.