Home Local BUVO ta gradici e bon acogida pa transmision resultado di eleccion 2017...

BUVO ta gradici e bon acogida pa transmision resultado di eleccion 2017 riba website di gobierno

SHARE

Oranjestad (buvo) Servicio Informativo di Gobierno (Bureau Voorlichting – BUVO) kier a gradici tur persona cu a sigui transmision di resultado provisional di eleccion 2017 riba e websitenan di gobierno, www.overheid.aw, www.gobierno.aw y www.government.aw, riba anochi di eleccion.

E website a haya un acogida hopi bon cu mas cu 23.000 bishitante. En total 120 localidad rond mundo a sigui e transmision, cu ta encera 85 pais y 35 estado Mericano. Paisnan y estado cu mas a bishita e websitenan ta Aruba, Hulanda, Corsou, Florida, Colombia y Venezuela.  

BUVO kier a gradici e dinamico y experto team di Directie Informatievoorziening en Automatisering (DIA), cu ta encarga cu e maneho tecnico di e websitenan menciona, pa e excelente cooperacion, apoyo y conseho valioso den e periodo pa preparacion pa eleccion 2017. Ademas nos gradicimento special na DIA pa desaroya e tremendo aplicacion pa website di gobierno pa por a haci e transmision aki posibel,  pa e apoyo y colaboracion excelente ricibi pa transmision riba website di gobierno riba anochi di eleccion, como tambe pa traha e Excel sheet sumamente popular pa yena resultado di eleccion.
Tambe un danki grandi na e coleganan di BUVO, pa nan aporte durante temporada electoral y riba e anochi di eleccion.
Tambe nos kier gradici CENSO pa duna BUVO e coreccion final di e resultadonan provisional di e anochi di eleccion y e  resultadonan oficial di eleccion 2017 despues cu Conseho Electoral a traha su proces verbaalnan dje eleccion riba 27 di september 2017.

.
Nos gradicimento tambe ta bay na prensa pa nan cooperacion y pa consulta nos paginanan di eleccion y di transmision di resultado provisional eleccion 2017.

Esnan interesa por wak e presentacion riba anochi di eleccion riba e pagina Eleccion 2017 -Resultado provisional di eleccion 2017.  Tambe por haya e resultadonan oficial riba e pagina di Stipulacion resultado di eleccion 2017 riba e websitenan menciona.