ORANJESTAD, Aruba: Tur aña Mary Joan Foundation ta organisa e Pink Walk Event, un caminata cu Aruba Bank a join pa asina conscientisa tur hende pa sostene e pashentnan/sobrevivientenan balente di cancer di pecho y tambe pa recorda esunnan cu a fayece. Pa Mary Joan Foundation por logra su metanan, Aruba Bank ta contento di sostene e fundacion pa sigui cu e bon trabou cu nan ta haciendo.
Tambe e evento ta pa recauda fondo pa cubri gastonan di Mary Joan Foundation pa por sigui cu nan trabounan, organisa eventonan gratis, programa di “wellness”, etc. pa nan cliente. E aña aki esaki lo yuda pa e gastonan di print foyetonan nobo pa sigui conscientisa riba e topico di cancer di pecho.
Dia 29 di October Mary Joan Foundation lo tin nan evento di “Light up the Path” Fun Walk & Run, cu lo cuminsa na Plaza Betico 6’or di mainta y ta termina eynan bek. E ruta lo ta den Oranjestad y ta organisa pa 297Runners y pa cu esaki e ruta lo tin e nomber di “Papi’s Route.”
Tur hende ta bon bini pa participa na e caminata cual tin un costo di Awg 20,- y cupo ta limita. E prome 1000 participante cu inscribi lo ricibi un dri fit shirt, boter di sport y wristband. E aña aki Aruba Bank a facilita e proceso di pago cu su servicionan di Online Banking. Cu Aruba Bank App, Aruba Bank Online y ABO bo ta scoge “Light up the Path” (MJF) den e address book y bo por pasa na e oficina di Mary Joan Foundation cu bo prueba di pago y asina ricibi bo articulonan. Print bo prueba di pago pa asina cu e fecha y luga wordo anuncia, por pasa busca bo pakete.
E evento aki ta pa fundraising y esunnan cu kier participa sin haya e gadgetnan, esaki ta posibel pero e prijs ta keda Awg. 20. E aña aki no tabatin un evento di fundraising ainda, pero a dicidi di concentra riba e luna di October cu ta luna di cancer di pecho.
Aruba Bank y Mary Joan Foundation ta invita comunidad di Aruba pa participa den e “Fun & Run Walk” pa asina nos tur hunto por yuda Mary Joan Foundation sigui cu nan trabou di conscientisa cancer di pecho.