Home » Minister Michelle Hooyboer-Winklaar: Inversion miyonario na metodonan nobo pa scolnan MAVO

Minister Michelle Hooyboer-Winklaar: Inversion miyonario na metodonan nobo pa scolnan MAVO

by sxm
0 comment 73 views

ORANJESTAD, Aruba: Recientemente Minister Michelle Hooyboer-Winklaar a confirma cu a logra aloca y inverti mas cu 1.5 miyon florin adicional na buki y material nobo pa tur scol MAVO di Aruba. E fondonan adicional aki a wordo aloca na comienso di aña door di Minister di Enseñansa den e Onderwijsfonds y a keda aproba na luna di mei ultimo door di Parlamento di Aruba.

 

Ta trata di un suma total di Afl. 1.557.879,20 cu a wordo poni disponibel pa bestel buki y material nobo pa e directivanan di scol di MAVO. Esaki ta fondonan adicional apart di e presupuesto anual di cada directiva di scol y ta conta pa tur e scolnan di MAVO di Aruba cu ta resorta bou di SKOA, DPS y SPCOA.

 

E inversion ta inclui metodonan nobo pa diferente materia, material adicional pa maestronan y materialnan di sosten. Cada directiva di scol a indica un prioridad diferente y Ministerio di Enseñansa a duna e espacio pa esaki.  Pa e diferente metodonan a scoge pa inverti den buki nobo pa henter e scol di klas 1 te klas 4, esta di ciclo basico 1 te cu ciclo avansa 2. Mayoria di e scolnan a scoge pa bestel metodonan nobo of e ultimo edicion di un metodo existente pa e diferente materianan. 

 

Por ehempel e metodo “Nieuw Nederlands” pa Hulandes, “Gente Joven” pa e materia Spaño, “Go for it” pa e materia Ingles, e ultimo edicion di “Moderne Wiskunde” pa e materia Wiskunde, “Geschiedenis Werkplaats” pa e materia Geschiedenis, “NOVA NaSk” pa Natuurkunde y Scheikunde y e metodo “Biologie voor jou” pa e materia di Biologie.

 

Tin scolnan cu a pone nan prioridad diferente na otro metodonan y materia y tambe na material di sosten manera materialnan di ilustracion pa e materia Wiskunde, Atlas pa e materia Aardrijkskunde y Prisma pocket woordenboeken pa e diferente idiomanan. Mientras tanto a manda pidi tur e materialnan via di e diferente agencianan local y ta den proceso di wordo entrega na e diferente scolnan MAVO.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio