Home » ASD Aruba ta duna di su parti pa salba nos medio ambiente

ASD Aruba ta duna di su parti pa salba nos medio ambiente

by sxm
0 comment 83 views

Sea den presente of futuro, tur ser humano merece di disfruta di e maraviyanan cu nos bunita naturalesa di Aruba ta ofrece. E santo blanco na bo pia, e brisa fresco na bo cara y e lama hopi serca ta e tres ingredientenan pa hasi bo bida of vakantie uno felis riba e pida paraiso aki cu no tin comparashon. Pa e motibo aki, na decada 1980, Aruba a habri su portanan na mundo, pa asina laga extranhero bin disfruta di su calido ambiente. Lamentablemente mas habitante y bishitante ta nifica mas desperdicio y no ta fasil pa mantene un isla chikito limpi. Pero un stap cada vez , ASD ta dedica na logra esaki!

Aruba & Supplies & Distribution, mihor conoci como ASD, a establece su mes na aña 2003 y  cuminsa cu un paar di cliente. Durante e añanan aki, ASD a crece rapidamente, ganando e confiansa di su clientenan, ofreciendo hotelnan, restaurante y casnan na Aruba cu diferente articulonan manera: papel higienico, forki, weya y sarten, set di cushina y paña pa e profesionalnan di limpieza y cushina. Pero poco añanan atras e compania a nota cu tabata tin falta di algo fundamental, su productonan no tabata wordo desecha na e manera apropia. Saconan di plastico ta bula bay den lama, cups di foam dera den santo y pijpnan tur caminda benta no ta loke ASD a visualisa pa nos dushi isla.

Esey ta trece un pregunta importante dilanti: Aruba tin un futuro sostenible? Aunke hopi ta bisa cu turismo no ta sostenible. Cu simplemente no ta posibel pa tin un isla limpi y saludable y tambe un turismo y economia prospero na mes momento. ASD no ta di acuerdo cu esaki. Kiko tabata e problema? E tabata exactamente e productonan di ASD: e saconan, recipiente y copinan – e mesun articulo cu ta drif riba lama of colga na e cadushinan. Si algo mester a cambia, e cambio mester a cuminsa cu nan. Na 2015, e gerencia di ASD finalmente a tuma un decision di hasi un promesa. Pero no na mundo, gobierno of e isla, pero pa nan mes. Nan a priminti cu Aruba no lo ta sushi pa via di articulonan cu ASD ta ofrece. Pero pa mantene e promesa aki nan no por a simplemente bende alternativanan na plastico y foam; nan lo tin cu stop di bende e articulonan original cu nan tabata ofrece tambe. Nan tabata conciente cu e situacion por a bay dos manera, nan plan por ta un exito total pa e isla of un fracaso masivo pa e compania. E team di ASD a wanta nan rosea y asumi e riesgo.

Un pa un, e elementonan mas perhudicial a cuminsa disparce for di e tienda y nan a wordo reemplaza pa opcionan mas sostenible y mihor pa medioambiente. Na 2016, ASD a stop e benta di saconan di plastic completamente y a cuminsa distribui saconan di papel reciclable. Na 2017, tur e productonan di Styrofoam a wordo reenplasa pa articulonan traha di carton y fibra vegetal. Hunto cu e compania, hotelnan y restaurantnan cu ya tabata ta trahando riba operacionnan mas sostenible, a coopera den e cambio masivo pa inclui articulonan reciclable den nan actividadnan. Den poco luna, e productonan nobo aki tabata tin un exito masivo. Pero pa ASD esey no tabata e fin.

Pa aña 2018, ASD tin planes di stop e benta di productonan plastico desechabel, no solamente saco di plastico. Saconan di plastico, utensilionan, pijp y cups lo wordo reemplaza cu alternativanan ecologico y mas sostenibel traha di palo, carton, of fibra di vegetal. Cuminsando na 2017, ASD ta poniendo solar panels na su edificio, cu e objetivo di opera cu 100% energia renovabel. Ya caba tres forklift electrico ta operando den e warehouse y lo wordo recarga cu energia solar, y auto electrico tambe ta na caminda.

E mensahe di ASD ta hopi cla y transparente. Nos tur, sea local of turista, merece un Aruba mas limpi, un isla unda e santo ta keda blanco, lama tin awa limpi, sin sushi crea pa e ser humano; un isla unda bo no lo haya un parha cu plastico den nan stoma, ni cadushi dorna cu sushi; un isla cu lama ta mustra virgen manera esun cu nos a disfruta cincuenta aña pasa. Pero tur esaki ASD no lo por logra solamente dor di reemplazando articulonan di plastico y foam y uzo di panel solar. ASD ta spera di por habri porta na un Aruba nobo. Un Aruba unda tur habitante ta colabora y encurasha otro pa celebra nos medio ambiente, en vez di malusa di dje. Un Aruba cu ta na haltura di carga e nomber di e ‘isla felis’.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio