Ta bay S.E. Gobernador dialuna merdia
ORANJESTAD – Animo tabata mes of mas halto cu semper na Cas di Partido Playa durante un reunion cu partido AVP a tene diadomingo atardi. E yamada a bin ultimo ora y asina mes a pak delaster un espacio di e sede cu candidato, dirigente y simpatizantenan.
Aki lider Mike Eman a ratifica y amplia e declaracion cu el a haci diabierna anochi, enfatisando tambe cu AVP ta, pa di tres biaha consecutivo, e partido mas grandi na Aruba. Eman a splica cu e ta preparando e organisacion pa tin un ekipo y liderazgo cu por hib’e den futuro, mientrastanto e lo keda na timon.
“Mi ta ripiti: ‘Mi no lo descansa te ora felicidad yega tur cas na Aruba’,” asina el a declara na un publico cu insistentemente tabata pidi’e pa keda na timon di AVP. Den e mesun discurso, Eman a bisa tur presente: ‘Warda bo bandera y warda bo t-shirt!”
Otro candidatonan manera Melvin Tromp, Richard Arends, Mervin Wyatt Ras, Marksonn Maduro y tambe Benny Sevinger a hiba palabra haciendo eco di e mensahe principal cu ta: Danki na un y tur cu a traha asina duro, nos tin e victoria di e eleccion y keda pendiente pa e desaroyonan. “Hunto nos ta bay caba cu e trabou cu nos a cuminsa na 2009,” asina Sevinger a expresa.
Por ultimo, Eman a splica kico ta bay sosode riba termino corto, esta cu dialuna merdia e ta bay cerca Gobernador pa inform’e di e posicion di partido AVP y pa esaki a invita tur sostenedor di AVP pa compañ’e. E posicion en cuestion ta cu ta duna tur espacio pa otro partidonan traha hunto.