STA CRUZ — “Apesar cu e resulta do di eleccion no tabata locual cu nos a spera den prome instante, nos ta sumamente contento cu e resultado di eleccion. Nos partido ta esun cu a sali victorioso di e eleccion 2017. Nos a crese di 17 mil pa 22 mil votos, y di 7 pa 9 asiento. Esaki riba su mes caba ta un logro enormemente grandi.
Nos a duna e comrpomiso di lo libra Aruba di e peor gobierno cu el’a conose, y nos a cumpli mirando cu AVP a declara cu e lo bai den oposicion y cu Mike Eman lo retira di politica.
Nos a duna e compromiso di lo rescata nos pais y caba cu corupcion, y nos lo cumpli cu esaki tambe.
Nos lo a prefera di a haya un mandato cla di pueblo, pero pueblo a papia y a vota contra tradicion. Esey ta pone cu nos mester carga nos responsabilidad pa cumpli cu comunidad di Aruba.
Danki di curason na henter e comunidad di Aruba, y na e 22 mil votadornan en especial. Pueblo a vota p’e cambio, y pueblo a vota pa caba cu corupcion. Hunto nos ta bai p’e cambio”, tabata palabranan di Evelyn Wever-Croes despues di eleccion.
ANALISIS DI RESULTADO DI ELECCION
E gran perdedor di e eleccion 2017 ta partido AVP, cu a perde 10 mil voto y 4 asiento. Esaki ta un perdida enorme, cu desde Status Aparte ningun otro partido a yega di pasa aden. Ta obvio cu pueblo a rechasa AVP, a rechasa corupcion, a rechasa mal maneho.
Di e 10 mil votonan ey, MEP a bai cu 5 mil, fortificando e nucleo di MEP bek.
Partido RED a bai cu 3 mil di e 10 mil votonan cu AVP a perde, hasiendo RED mas gradi desde su inicio na 2005.
Y 2 mil di 10 mil votonan cu AVP a perde a bai pa POR, cu a duna POR 2 asiento cu ya nan tabata tin caba den Parlamento di Andin Bikker y Marisol Lopez-Tromp.
Basa riba e analisis aki, MEP ta e partido victorioso di e eleccion, apesar cu partido AVP tin 1307 voto mas hopi cu partido MEP. MEP a crese cu 25%, AVP a cai cu 30%. MEP a crese den tur urna cu excepcion talves di un of dos. Esaki ta danki na e tremendo liderasgo di lider di MEP Evelyn Wever-Croes.
Formacion di gobierno nobo lo no ta facil, mirando e resultado, sinembargo e no ta imposible. MEP lo asumi su responsabilidad den esaki pa brinda Aruba e gobierno cu e por ta orguyoso di dje. Pabien na partido MEP, y tur candidato cu a traha hopi duro pa logra esaki.
