Home Entertainment YMCA Aruba lo tin nan di dos Free Family Fun Day Lo...

YMCA Aruba lo tin nan di dos Free Family Fun Day Lo tin weganan pa tur edad

SHARE

ORANJESTAD, Aruba: E aña aki YMCA Aruba ta organisa nan di dos Free Family Fun Day, cual ta un actividad cu aña pasa a bin cun’e pa prome biaha. A organisa e prome Family Fun Day na YMCA Dakota y e biaha aki nan a dicidi cu lo tene e actividad na YMCA San Nicolas dia 1 di October proximo.

 

Youth Worker di YMCA Aruba, Sherwin Wester a splica cu e actividad lo ta pa tur edad, esta di muchanan chikito te adulto. YMCA Aruba ta organisa e actividad aki unda cu famia ta bini hunto y por participa den e weganan cu tin. E diadomingo aki lo tin e Youth Workers conhunto cu boluntarionan, kendenan lo ta esunnan encarga pa guia e weganan. Lo bay tin diferente wega, entre otro fox tails, building and builders. Esakinan ta weganan cu hende normalmente no a tende di nan, pero lo ta un momento hopi divertido.

E boluntarionan a ricibi training for di studiante di Moveshon y Salud John Leo, kende a train y duna splicacion di e weganan na e Youth Workers y boluntarionan pa asina nan por guia e weganan.

 

E orario di e Family Fun Day lo ta 10:00 AM te cu 4:00 PM. E entrada lo ta gratis pa tur hende, unda tur hende por bin pasa un dia dushi cu nan famia. YMCA Aruba ta invita comunidad di Aruba pa yega diadomingo dia 1 di October YMCA San Nicolas, pasobra e dia lo ta uno divertido. Lo bay tin weganan special pa muchanan y tambe pa hendenan grandi. “Nos tin weganan pa diferente edad. E ta pa tur hende”, Sherwin Wester a bisa. YMCA Aruba a organisa e dia aki pa asina famia por bini hunto pa asina enfoca ariba e salud y bienestar di nos muchanan y hobennan.