Home Politics MEP: Ciere di campaña di MEP tawata grandioso Un publico cu hopi...

MEP: Ciere di campaña di MEP tawata grandioso Un publico cu hopi emocion a celebra hunto cu nos

SHARE

Partido MEP a cera su campaña electoral na grandi diaranson ultimo. Un publico grandi a bin pa nan brinda nan sosten na Parido MEP. For di oranan tempran di atardi, e publico a cuminsa yega pa celebra ciere di campaña hunto cu nos.

 

E anochi a habri cu presentacion di Robert y su Solo Banda Show kendenan a pone ambiente total di eleccion. D’licious no a para cortico y a trece tambe bon ambiente pa e publico cu tawata den euforia total den vispera di votacion.

 

Un momento hopi emotivo tawata ora cu e 29 candidatonan a subi stage y Etiene Yarzagaray a canta e cantica “Bo ta Santo”. Tanto e publico como Lider di MEP y tur e candidatonan a bira sumamente emociona. Un momento di reflexion pa nos tur presente cu tin e speransa cu MEP y Aruba henter lo ta Victorioso pa e eleccion aki.

 

E anochi a culmina bou animacion di Claudius Philips y Oreo. Aki ta unda cu Mr. Saab, kende a bin di Corsow pa duna un presentacion unico pa e ocacion aki. E cantica “Ta Muher ta manda mundo”, no por a keda afo, cu a wordo dedica na nos Lider, sra Evelyn Wever-Croes, 

 

Lider di MEP, den su discurso, ta extende palabranan di gradicimento na e publico presente y na Aruba henter pa e sosten cu Partido MEP a ricibi den cada hogar, den mensahenan, den yamadanan na telefon. Tambe Lider a duna palabranan di gradicimento na tur cu a traha duro durante e campaña aki pa.

 

“Mi kier a gradici tur cu a duna tur nan tempo pa dedica na e campaña aki. Na tur esnan cu a campaña tur dia cu nan candidato. Na e famianan di cada candidato cu a duna nan espacio pa ta ausente durante dianan di campaña. Na ekipo di mercadeo y tur esnan cu a haci tur nos actividadnan un exito rotondo. Y un gradicimento tambe na Pueblo di Aruba cu a ricibi nos cu brasanan habri for di inicio di nos campaña te awo. Un danki profundo na cada un di boso”, tawata e palabranan profundo di sra Evelyn Wever-Croes.