Home » RIU Hotels & Resorts a celebra siman di “House Keeping”

RIU Hotels & Resorts a celebra siman di “House Keeping”

by sxm
0 comment 66 views

ORANJESTAD, Aruba: Riu Palace Aruba y Riu Palace Antillas a celebra siman di “House Keeping” cu diferente actividad cu e empleadonan. Nan tabata masha contento y e actividadnan a bay den un ambiente ameno, unda cu tabata papia, hari y haci joke cu otro. Henter siman cada Riu tabatin nan propio programa di actividad.

 

E siman aki a sirbi pa reconoce e esfuerso diario di empleadonan di House Keeping. “Nan trabou ta esencial pa ofrece bon servicio. Ta ripara di biaha si e no ta bon haci y esaki ta pasa casi disparce ora e ta perfecto. Tur team ta hopi importante pa nos y p’esey nos kier reconoce nan durante e siman aki”, Vanesa Fernández, director general di Riu Parace Aruba a splica.

 

E siman di House Keeping Week tabata di 11 te cu 17 di September. Riu Palace Antillas a prepara un programa di diferente actividad pa e empleadonan, kendenan a disfruta masha hopi mes. Dialuna nan a cuminsa cu un santo sacrificio di misa unda a gradici pe trabounan cu nan ta haci y despues nan a haya algun snack. Diamars e dia a cuminsa cu un desayuno den un di e restaurantnan y empleadonan a ricibi un presentacion di House Keeping banda di e area di pool. E actividad a continua diaranson anochi cu un grandioso bowling, unda e ambiente tabata masha dushi mes y e empleadonan tabata competitivo entre nan mes. Diahuebs e ambiente a continua y e empleadonan a pasa un momento emocionante durante e wega di bingo, unda cu diferente premio a keda gana. Diabierna atardi e team di House Keeping tabatin e evento di Zumba, unda cu nan a haci ehercicio bailando. Tambe tabatin eleccion di reina durante e evento di Zumba. Diasabra Riu Palace Antillas su siman di actividad a termina cu un tremendo y famoso BBQ. Durante e BBQ a rifa varios rifa.

 

Na Riu Palace Aruba e empleadonan di House Keeping a cuminsa e siman cu un misa y despues e trabounan a sigui normal. Diamars mainta nan a reuni den e ballroom, unda a atende y sirbi e empleadonan un dushi desayuno. E celebracion di siman di House Keeping a sigui diaranson cu e actividad di bingo y despues di esaki a sigui cu rifa. Diahuebs mainta nan a bay Casa Cuna y a haci un donacion. E muchanan a keda entusiasma cu nan regalonan. Diabierna e ambiente a sigui cu un fiesta na lama y e empleadonan no tabata kier pe evento termina, mientras diasabra atardi gerencia di Riu Palace a organisa un cuminda den e ballroom. Diadomingo e siman di House Keeping a termina y nan a haci esaki riba catamaran. E empleadonan a disfruta di e actividadnan. Nan a gradici gerencia di Riu Palace y Riu Antillas pe siman di House Keeping.

 

Famia Riu a funda RIU Hotels & Resorts como un hotel chikito na aña 1953, na Majorca, Spaña. Awendia RIU, ta ofrece 95 hotel, di cual riba 70% ta ofrece acomodacion “all inclusive”. Riu Hotels & Resorts ta bou maneho diario di e di tres generacion di famia Riu, cu su oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka.

 

Aki na Aruba, Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Entre e dos hotelnan RIU na Aruba, nan ta emplea riba 800 empleado, brindando huespednan e miho nivel di servicio.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio