Diabierna awor ta un dia hopi importante pa democracia di nos pais, caminda e pueblo lo bay scoge su 21 representantenan den parlamento cu tin e tarea noble di sirbi nos pais. Sinembargo locual a resalta y cu a trece un mancha scur riba henter e campaña electoral aki ta e echo cu casi na final di e campaña minister Paul Croes a ser deteni y actualmente ta cera den KIA y hunto cu ne henter su ministerio, esta for di chauffeur te secretaria y coordinador. Sin duda cu esaki ta yena henter nos pais cu berguensa, ya cu e minister aki ta e sospechoso principal di fraude, labamento di placa, soborno pa cu e ontheffingen, pero te ainda ta keda den funcion y ta ser paga sagradamente tur luna cu placa di pueblo.
Fraude gigantesco
Echo ta cu desde Status Aparte cada biaha nos pueblo por mira con corumpi partido AVP ta. Nos por a mira esaki durante e periodo 1986-1988, caminda e ministronan a tene man y deal cu e Italianonan Mafioso y cual a desemboca den e garantianan di e hotelnan den ruina, esta Beta, Ramada y Plantation, caminda nos pais a ser perhudica pa un suma di 206 miyon dollar y esaki basa riba un sentencia di Corte Internacional na Den Haag.
Den e di dos periodo di gobernacion di AVP (1994-2001), nos a haya e famoso proyecto corupto Fondo Desaroyo San Nicolas. Y aki MEP kier a trece padilanti con na November 2003 na e ceremonia di despedida di fiscal Frits de Groot den Fort Zoutman, Procurador General di Aruba a bisa lo siguiente di e investigacion riba e proyecto Fondo Desaroyo SN:“En daarnaast als Officier van Justitie zelf heeft Frits ook een heel onderzoek geleid, een heel groot onderzoek dat nog gaande is, eigenlijk een groot fraudeonderzoek, we kunnen wel zeggen het grootste fraudeonderzoek wat wij hier hebben gehad in Aruba”. E declaracion aki siguramente a pone henter cara di Aruba na berguensa y a simbolisa e 7 añanan di corupcion, fraude y ladronicia cu a tuma lugar bao di gobernacion di AVP.
Roversnest
Tambe MEP kier a trece padilanti locual e ex-Presidente di Banco Central, J.H. du Marchie Sarvaas a skirbi di Gabinete Eman den un carta dia 24 di maart 2000: “Niet alleen financieel is de publieke sector van Aruba het problem. Ook moreel. Naar mijn wellicht te zeer door de Nederlandse situatie gekleurde oordeel heeft een hoge mate van partijpolitieke verzuiling een groot deel van de overheid doordrenkt met inefficiency, amateurisme, patronage en vriendjespolitiek, volgens sommigen ook met intimadatie en corruptie. Regeringen Eman gaan met de verkeerde mensen in zee of gunnen het een en ander aan politieke vrienden, naar men zegt soms ook bij wijze van terugbetaling van verkiezingsbijdragen”. Increibel, con e Hulandesnan profesional ta pensa di gobierno di AVP!
Tambe pueblo no mester lubida con e parlamentario Hulandes Frits Bolkenstein di VVD a yama partido AVP un ‘roversnest’, esta un neishi di ladron!
En general corupcion tabata pesta den tur e gobernacionnan di AVP for di 1986 te cu 2017.
Pero locual a sosode den e gobernacion di AVP di 2009 pa 2017 a kibra tur record pa loke ta corupcion, fraude, ladronicia caminda e hendenan aki a piratia henter e pais aki y previlegia esnan cerca di nan, nan famia, amigo y compinchinan. Anto ainda nan tin e curashi pa pidi confiansa di e pueblo un biaha mas diabierna awo! Pueblo ta vota: No na Corupcion!