ORANJESTAD, Aruba: Plataforma Promocion di Salud tin representacion di 7 organisacion y un dokter di cas, esta ImSan, IBiSA, AZV, SVB, Wit Gele Kruis, Hospital y Departamento di Salud Publico como voorzitter. E meta di e plataforma ta pa traha hunto pa prioritisa e problemanan relaciona cu malesanan cronico y pa yega na un comunidad di Aruba cu tin un estilo di bida saludabel.
Pa canalisa e informacion di diabetes y informa e poblacion di Aruba ariba e topico aki, Plataforma a partner cu Aruba Lions Club locual a cubri e parti financiero, pa desaroya un serie di 9 foyeto. A presenta esakinan awe mainta den presencia di minister Schwengle, Presidente di Lions Club y e miembronan di plataforma.
Director di Wit Gele Kruis a gradici tur hende cu a contribui y para tras di e proyecto aki. Wit Gele Kruis a ripara cu e edad di diabetes tipo 2 ta bahando y esaki ta algo di lamenta pasobra por preveni esaki. Pe motibonan aki a traha un serie di foyeto pa henter Aruba unda, antes cada instancia tabata tin diferente foyeto. Desde awe tur instancia, tur dokter di cas, tur specialista cu tin di haber cu diabetes, lo bay ricibi e mesun foyetonan aki pa nan pashentnan.
Joost van de Kamp di Fundacion Diabetico ta haya cu e foyetonan aki ta sumamente importante, pasobra tur cos ta cuminsa pa hisa e nivel di conocemento di diabetes. Kiermen kico diabetes ta, pero tambe con pa control’ e. E enfermedad aki por keda controla y si un hende tin e, ta importante pa percura cu e no bira mas pio y e consecuencianan ta mas grandi. E 9 foyetonan cu a keda traha, ta duna bon informacion na hendenan cu tin diabetes caba of tin riesgo grandi pa haya e enfermedad aki. Tambe e famia por haya sa con pa deal cu e malesa y con pa biba cun’e. Un cambio den estilo di bida cu suficiente actividad fisico y un dieta balansa ta yuda cu esaki.
Pa 3 aña y mey Aruba Lions Club ta atendiendo cu e peticion pa yuda financieramente cu e asunto di diabetes. Tur ora cu a trata e topico, e directiva ta pone atencion. E proyecto di diabetico ta di Lions International y e clubnan ta atende cun’e si ta desea di haci esey. Lions Club di Aruba semper a concentra riba esaki y pa hopi aña nan ta yudando hospital cu cama y rolstoel. Ora ta papia di hospital y rolstoel, esaki ta na final di diabetico ora ta papia di amputacion. Esaki ta pone cu mester bay enfoca mas riba e parti preventivo y no curativo.
Aruba Lions Club ta haya e idea aki pa bay na e nivel preventivo uno hopi importante, mas efectivo y mas exigente. Por crea esaki door di e conscientisacion di e foyetonan, unda cu den futuro tin un comunidad mas saludabel cu ta come miho y un reduccion di hendenan cu ta diabetico. E enfermedad aki ta uno sumamente erg y den e ultimo 2 añanan ora cu Bibi di Aruba Lions Club a entrega e cama y rolstoelnan, el a combersa cu hopi famia. El a weita con tristo e cosnan aki ta y su persona a bira mas consciente cu mester enfatisa riba esaki. Mas mucha jong ta birando diabetico cual antes no tabata asina. Cu e foyetonan aki hopi hende lo ta mas consciente y e mayornan por mira con pa yuda nan yiunan. Tin un grupo grandi cu no ta reconoce cu nan tin e enfermedad ainda. Esey ta loke mester cambia y esey lo tuma su tempo. A cuminsa riba e bon caminda, unda cu Wit Gele Kruis a haci un bon trabou conhuntamente cu miembronan di Plataforma y cu e sosten di Aruba Lions Club.