ORANEJSTAD, Aruba: Cuerpo Policial a entrega Decreto Gubernamental (landsbesluit) na 3 agente policial, kendenan a ricibi rango mas halto. Ta trata aki di Andrew Hoo y Silvio de Mey como Inspector Primera Clase y Gabriel Thiel como “Onder Inspecteur”. A celebra e promocion aki hunto cu nan famia y coleganan, kendenan tabata orguyoso di e logro aki.
Asina aki Cuerpo Policial a fortifica su organisacion y ta contento cu nan, pasobra nan tin un trayectoria basta largo den KPA. Altocomisario, mr. Adolfo “Dolfi” Richardson a indica cu Cuerpo Policial ta hoben y ta rekeri esunnan cu ta den “leidinggevende functie” pa nan sigui haci nan trabou manera custumber, pero tambe pa sigui yuda maneha e cuerpo pe bay den un bon direccion.
Gabriel Thiel a ricibi su Decreto Gubernamental y awo e ta onder inspecteur. E ta un agente policial excepcional y tin hopi conocemento den su trabou, pasobra antes e tabata den militar. Tin hendenan den Cuerpo Policial cu tin hopi conocemento y Gabriel Thiel ta un di nan, segun Altocomisario Richardson. E tabata contento cu su promocion, unda cu el a bay studia y a bin topa cu algo diferente na Scol di Polis.
Silvio de Mey tin hopi aña di servicio cu Cuerpo Policial Arubano, pero su trayecto a cuminsa cu Korps Antias. El a haya e opcion pa scoge unda e kier sigui, pero Silvio de Mei a scoge pa keda den KPA. El a forma parti di BIF cu antes tabata BIZO, pero a sigui crece den diferente departamento. “Mi ta gradici mi famia, specialmente mi señora cu a sostene mi y KPA pa laga mi crece”, el a bisa. El a bay Hulanda pa termina su estudio como inspector. Un conseho cu e tin pa agentenan policial hoben ta pa nan keda enfoca y sigui pa nan meta y pa no rindi.
Na aña 2001 Andrew Hoo a cuminsa cu su carera como agente policial y a traha den diferente departamento, unda cu el a sigui crece. Hopi hende a bis’e pe no bira Polis, pero den su curason esey ta loke cu e tabata kier aunke cu e tabatin un otro estudio. Luna pasa el a sali for di KPA y bay traha den hotel, pero su curason, mente y sanger semper ta keda den Polis. El a gradici Altocomisario y Cuerpo Policial pe oportunidad cu el a ricibi pa traha den KPA.