Home » Responsabilidad di gobierno ta pa cumpli cu infrastructura! Habitantenan no mester sinti manera ta un fabor nan ta ricibi di AVP

Responsabilidad di gobierno ta pa cumpli cu infrastructura! Habitantenan no mester sinti manera ta un fabor nan ta ricibi di AVP

by sxm
0 comment 62 views

Durante e ultimo simannan prome cu eleccion, partido AVP, den un otro intento pa manipula mente di pueblo y piki algun voto aki aya, a dicidi di asfalta algun caminda y pone klinkers den diferente bario na Aruba y esaki despues cu pa 8 aña largo nan a lubida riba e habitantenan di tur e barionan aki. Hecho ta cu 8 aña largo e gobierno aki a pensa solamente riba proyectonan miyonario manera Green Corridor y Watty Vos Boulevard, caminda miyones di florin ta lora, tanto riba mesa como bao mesa y a neglisha e demas barionan di Aruba.

 

Manipulacion ta sigui

Berdad ta cu hopi habitante ta considera drechamento di caminda y barionan como un midi ora di huzga si un gobierno ta haci un bon trabao. AVP a haci maluzo di e percepcion aki pa propaganda su mes como politiconan cu ta stima e habitantenan. Alavez nan kier crea cada biaha e impresion cu ta nan a inventa e ponemento di luz den bario, siendo cu bao di gobiernonan di MEP den pasado un gran cantidad di bario rond Aruba a haya luznan di caya, pero cu e diferencia cu nunca por a mira e ministernan di MEP ta haci locura di subimento di truck y ‘instala’ e luznan aki, pero a haci esaki den ceremonianan respetuoso y sin crea e impresion cu ta un fabor ta wordo haci na e habitantenan. Un y tur den e pais aki mester ta consciente cu infrastructura manera pone luz den bario, drecha caminda y barionan ta nan derecho pasobra p’esey nan ta paga belasting y segun tin placa ta drenta. Gobierno su responsabilidad ta pa percura pa cumpli cu e infrastructura sin pone e habitante sinti manera ta un fabor nan ta haci nan. Falta pa mayan na lugar cu muchanan di scol haya nan bukinan for di juffrouw di scol, politiconan di AVP mes ta pasa den tur klas y entrega esakinan personalmente. Esaki ta netamente manipulacion di mente di un pueblo.

 

Klinkers pa gana voto  

Politiconan di AVP mes a duna bida na e percepcion cu tin di midi nan trabao na e cantidad di infrastructura visibel manera e cantidad di klinkers. Klinkers ta hopi visibel y AVP su interes grandi ta pa mantene e percepcion eroneo di e realidad aki bibo pa gana voto.

Pa AVP y Mike Eman, gobernacion kiermen traha riba infrastructura di proyectonan miyonario cu of sin placa pero den realidad esey no kiermen resolve problemanan manera baha e deficit, baha e Megadebe, duna mihor cuido medico, combati criminalidad y percura pa un miho nivel di educacion. Puntra bo mes cu si abo como mayor bo muri bay laga bo yiunan cu un debe grandi atras, sin educacion, rondona cu criminalnan y cu falta di cuido medico y sin trabao, pero den un cas di cinco strea yena cu klinkers! Bo ta kere bo yiunan lo bisa: Mi mayornan a haci un bon trabao? Wel pueblo di Aruba ta mescos.

 

Moralidad y etica

Tanten cu e gobierno no haci un bon trabao di berdad den goberna e pais aki drechi, AVP y Mike Eman lo sigui midi cu criterianan mediocre manera klinkers pa hustifica un trabao ficticio y purba convence pueblo pa huzga nan basa ariba e mediocridad ey!  Pueblo di Aruba tin di para pa loke ta corecto, moralmente y eticamente y scoge su gobernantenan basa ariba etica y moralidad halto. Pueblo mester pensa bon prome cu bolbe vota pa AVP, sino pueblo lo bolbe haya  gobernantenan cu lo sigui cu e falsedad y manipulacion aki. E campaña manipulativo di asfalta caminda y pone klinkers den bario cu partido AVP ta hibando den e ultimo dianan aki tin un solo meta y esey ta pa nan keda na poder y sigui abusa di pueblo. Y despues di eleccion, e barionan y pueblo lo por wel di lubida atrobe riba AVP.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio