Aruba tin capacidad pa produci suficiente carni, fruta y berdura pa consumo local
Un di e dolornan di mas grandi di nos agricultura ta e awa. Awa loke ta esun di mas caro pa nos agricultornan y na Aruba pa basta tempo nos no tabatin suficiente yobida. Ora cu nos haya yobida lamentablemente nos damnnan no ta den e miho estado pa por utilisa e awa aki. Pa hopi tempo ta conoci cu tin problemanan pa loke ta damnan/awa cu ta wordo contamina.
POR den e proximo gobernacion lo percura pa intensifica control di contaminacion di awanan di dam. Actualmente tin ley pero no tin hendenan pa por ehecuta e control. Banda di esaki e leynan aki lo wordo reenforsa y otro leynan di medio ambiente lo bay wordo institui pa di e forma aki logra na mehoracion di e condicion di nos awanan di dam. Pa hopi aña no a pone fondo disponibel pa por traha damnan artificial y crea damnnan adicional rond di Aruba. Hasta si nos haci esaki, nos a mira e efecto di e yobidanan cu tabata hopi limita, ta pesey a cuminsa cu e proceso di molina di awa.
Inversionnan
Santa Rosa a inverti den 5 di e molinanan aki, cu e posibilidad pa expansion. Pero si awa no yobe, hasta bo ‘subsuelo’ na cierto momento no tin suficiente awa. Consecuentemente, ora cu pomp loke cu tin e ta bin sala ariba y no por wordo utilisa. A inverti den e Rioolwaterzuiveringsinstallatie (RWZI) cu tin na Parkietenbos. A inverti casi 1 miyon florin pa por a pone un UV instalatie pa por saca e bacterianan for di e awa cu ta wordo produci. Lamentablemente durante dos aña e inversion aki practicamente a bay perdi door cu e prome proceso cu tincu tuma luga cual ta encera filtramento cu ta den man di DOW, su mashinnan nunca a funciona. Kiermen lo mester inverti den esaki tambe. Otro posibilidad cu tin ta pa sigui negocia cu WEB, cual ta algo cu a cuminsa cu ne. E ta encera henter un inventarisacion pa loke ta trata e necesidad di e cantidad di awa. WEB ta dispuesto pa pone un instalacion cu nos a papia riba dje pa produci specificamente pa e sector aki. Gobierno e ora ey mester subsidia cierto fondo di dje, pasobra finalmente WEB tincu cubri su gastonan.
Den e programa di POR ‘ Vision 17-21 Hunto Nos POR’ ta poni, cu Sector Primario ta un di nos pilarnan. Mayan nos lo por bay sostene nos mes sikiera pa produccion local. Pues no ta papia ainda di produccion pa hotelnan, pa cual mester di un producccion hopi mas stabiel y di un volumen hopi mas halto. Pero cu door di e inversionnan ariba menciona, nos lo por yega na produci carni, berdura y fruta pa consumo local.