Manera ta conoci, desaroyo tecnologico ta avanza asina rapido y ta hiba nos sistema di educacion y curiculo di enseñansa tambe den un transformacion acelera. Transformacion di nos enseñansa continuo, ta e reto cu nos tin pa keda den e rumbo cu educacion ta bay. Aruba den e ultimo añanan ta topa cu hopi desafio riba nivel di educacion. Sigur si mira e cantidad halto di mucha cu ta keda sinta tanto na scol basico como na scol secundario. Nos maestronan ta confronta hopi desaroyo social complica y continuo cu nos muchanan ta biba den. Durante e añanan cu a pasa, IPA a organisa un serie di congreso internacional pa pone enfasis riba tranformacion di e maestro di siglo 21. Actualmente nos conoce hopi forma didactico y metodo nobo cu ta yuda nos studiantenan hisa nan nivel, nan desaroyo y nan competencianan.
Innovacion ta un palabra sumamente clave cu ta referi na mehoracion di enseñansa na Aruba. Pero, e pregunta ta keda, kico ta innovacion den enseñansa? Con ta bay implement’e y cu ki fondo lo financia e implementacion aki? A trata tur e preguntanan aki den e foro politico di IPA cu a tuma luga diaranson dia 13 di september di 1 or di merdia pa 4or di atardi y a profundisa den plannan di diferente partido politico pa loke ta trata enseñansa y e posicion y identidad di IPA specificamente. Den cuadro di e reto di finanzas publico studiante y personal di IPA tabata hopi interesa pa haya sa con creativo cada partido ta pa logra e innovacion necesario. IPA a extende un invitacion na tur studiante y stakeholder pa participa na e foro di enseñansa. E asistencia tabata sumamente bon y IPA ta manda pa medio di e comunicado aki un palabra di gradicimento na tur cu a participa na e panel y un felicitacion na tur studiante y personal di IPA pa un foro politico exitoso.