Den 2015, diferente pais a firma tratadonan relata na desaroyo sostenibel y cambio climatico. Nos tur por corda con Prome Ministro di Aruba, Mike Eman, a haci un show manera ta e mes ta secretario general di Nacionnan Uni y cu e ta e profesor cu a descubri cambio climatico. Segun Mike e mester a bay diferente conferencia pa scapa mundo y universo y casi no tabata na Aruba pa goberna y resolve problemanan di Aruba.
Den e dianan aki tawata tin un experto di Nacionnan Uni na Aruba kende a invita mi persona como lider di MEP, pa un reunion pa splica tocante diferente topico, incluyendo peligernan natural cu por menasa Aruba y cu Aruba mester ta bon prepara contra esaki. Mi a compronde cu Prome Minister di Aruba tambe a wordo invita pa bin scucha tocante tur e peligernan aki. Lastimamente nos Prome Minister Mike Eman, no tabata interesa, y a prefera di bay campaña y haci show politico demostrando di nobo cu su interes no ta Aruba.
Aruba su economia ta depende primordialmente di lama. Aruba ta sumamente vulnerabel pa condicionnan di clima y lama. Expertonan ta indica cu Aruba ta den e parti sur di e faha di orcan, y nos ta den un area di peliger di tsunami y temblor. Pues aunke e chens pa wordo afecta pa un horcan ta mas chikito cu Isla Riba, nos no por descarta e posibilidad, pasobra esaki a yega di pasa den pasado caba. Tur e factornan aki di naturalesa ta haci necesario cu Aruba mester tin un bon sistema di reduccion di risico di desaster pa asina Aruba por logra e obhetivonan di desaroyo sostenibel. Aruba mester bay den un sistema di alerta multi- risico tempran, pa asina limita e efectonan di un posibel tempestad di tempo, clima, of otro actividad geofisico . E Radar cu tanto Meteo ta puntra pe pero cu te ainda Meteo no por haya ta un bon instrumento pa yuda emiti aviso pa tempestadnan di tempo. Aruba mester di cambia di e idea bieu di djis inverti den reparacion di daño causa pa un fenomeno natural, y bay mas den direccion di un miho maneho di risico y prevencion.
Datonan di ultimo decada ta indica cu tin un aumento den frecuencia y severidad di desasternan natural. Cambio climatico por añadi na e problemanan aki. Esaki na su turno tin un impacto grandi riba e desaroyo socio-economico di un pais. Segun un relato den un corant local despues di un training di tsunami, a resulta cu varios lugar ta core peliger pa inundacion y lo no ta accesibel pa publico, incluyendo nos Hospital di 5 strea.
E experto di Nacionan Uni a bin no solamente pa mustra Aruba riba su peligernan pero tambe pa facilita posibel ayudo financiero pa Aruba pa drecha e sistema di aviso na Aruba cu aparatonan moderno y adecuado pa departamentonan concerni manera Meteo y tambe pa upgrade di personal. Lastimamente cu Mike Eman a core un biaha mas pa su responsabilidad y a demostra cu desaroyo sostenibel no ta prioridad di Mike. Desaroyo sostenibel y reduccion di risico di desaster SI ta un prioridad pa partido MEP y lo enfoca riba esaki ora drenta gobierno despues di eleccion. Mike Eman, mester compronde cu haci bunita riba papel of dilanti prensa no ta yuda Aruba cu nada.