Oranjestad: Diahuebs merdia a tuma lugar e caso sumario den corte cu partido MEP a entama contra Gobierno di Aruba, despues cu Minister President Mike Eman a dicidi cu AVP lo core parada Diadomingo 17 di September, cual MEP no tabata di acuerdo cu e desicion aki, mirando cu ta for di 4 di januari 2017, e partido MEP a manda su peticion pa un permiso pa core parada e fecha aki.
E caso a cuminsa for di 2’or di merdia. Gobierno tabata representa pa abogado Hans Sjiem Fat y Abogado Anthony Ruiz a representa e partido MEP. Varios miembronan di ambos partido tabata presente den corte durante e caso summario aki.
Algo pasa di 4 or e prome abogadonan a sali y Marlon Sneek a duna su declaracion bisando cu hues a duna AVP rason pa core parada diadomingo awor, segun Marlon Sneek, hues a bisa cu no ta bon pa tene dos parada e mesun momento y cu ta Minister Mike Eman ta esun cu por tuma e decision y a tuma e decision pa AVP core parada. Tambe ela bisa, cu AVP lo continua cu e preparacionnan pa core parada diadomingo awor.
Despues di un rato Lider di partido MEP tambe a sali y a duna su declaracion cu MEP a hiba gobierno corte mirando cu Gobierno a nenga nan di core un parada legal dia 17 di september 2017, e peticion a wordo entrega for di 4 januari 2017. Normalmente tur peticion haci na gobierno esun cu entregue prome ta hay’e. Despues a resulta cu partido AVP supuestamente lo a entrega un peticion dia 7 di mei 2017, e peticion aki, nan no a mire niun momento.
Mike Eman como Ministro di asuntonan encarga cu orden publico a dicidi cu e ta duna su partido e permiso pa core parada y no a duna partido MEP, pesey MEP a hibanan corte.
Evelyn ta lamenta cu nan mester a scucha di hues, cu MEP no a gana e caso pa core e parada dia 17 di September 2017, pero Lider di MEP a sigui bisa, cu esaki ta e menos di su precupacionnan y ta trahando duro pa haya e parada di victoria dia 24 di September 2017.
Segun e lider di MEP, hues a basa su mes awe gran parti cu dos partido grandi no por core parada e mesun dia y cu ta Mike Eman mag di dicidi na ken e ta duna e permiso.
Lider di MEP a splica cu despues cu e caso a termina nan a mira cartanan di Cuerpo Policial dirigi na Mike Eman en cual Cuerpo Policial mes ta bisa cu pa cuminsa MEP a manda su peticion prome y cu Minister Eman a ignora esaki y a dicidi cu ta AVP ta core e parada. Cuerpo Policial a bisa cu por laga tur dos partido grandi core parada riba e mesun dia y esaki tambe a wordo ignora pa Mike Eman. Segun lider di MEP e carta aki a wordo scondi door di e abogado di Gobierno, ni pa MEP of e hues por a mira esaki. Pa e motibo aki lider di MEP lo bay tuma paso contra e abogado aki.
Lider di MEP Sra. Evelyn Wever Croes a sigui bisa, cu e decision ta riba mesa maske segun e lider e ta manipula, MEP lo respeta e decision di hues, pero esey no kemin cu MEP lo keda cas diadomingo awor. Aruba ta di nos tur y nos tur ta liber pa bay unda nos kier, MEP lo bay campanja di bario pa bario massalmente pa saluda nos hendenan. Y asina lider di MEP ta extende un invitacion na un y tur pa companja nan y na e mesun momento nan lo organisa un accion pa recauda fondo pa yuda e damnificadonan na St. Maarten.
E accion lo yama “YUDA SIN MIEDO” e buson y e campanja massal lo cuminsa pa 1’or di merida na San Nicolas y lo pasa den tur e barionan y lo termina na e Plaza Starke den curason di playa na Paardenbaaistraat, caminda pa 6’or di atardi lo ta bay tin un actividad ameno pa cera e dia aki.