Home Uncategorized Den asistencia pa St. Maarten Aruba hunto cu Defensa di Hulanda a...

Den asistencia pa St. Maarten Aruba hunto cu Defensa di Hulanda a transporta pashentnan urgente

SHARE

ORANJESTAD – Adicional na e asistencia cu Pais Aruba ta brindando nos rumannan di St. Maarten den aspecto di rescate y reconstruccion,  Prome Minister Mike Eman a bay en bibo na radio dialuna merdia pa avisa famia y amigonan di Arubianonan pega na St. Maarten, cu a logra dos vuelo pa cuminsa trece nos hendenan bek. E vuelonan aki ta bin despues di a atende debidamente cu e urgencianan medico di mas grave, por ehempel, e pashentnan di dialyse cu a yega diasabra anochi.

Durante su turno na radio, Prome Minister Mike Eman a splica cu e reto directo despues di e pasada di e horcan na St. Maarten, tabata e comunicacion aereo cu na prome instante no tabata existi mes mas. “Poco-poco a restablece un comunicacion aereo cu a pone cu, na prome luga, e aspectonan di urgencia medico a hunga un rol hopi importante. Hunto cu avionnan di Defensa di Hulanda nos a logra di por a duna transportacion na un cantidad di pashent cu a bin Aruba y Corsou,” tabata e palabranan di e mandatario.

Manera ta conoci, Aruba a tuma mas di 20 pashent caba cu a bin pa haci dialyse. Segun Premier Eman e ayudo ta nifica un reto grandi pa nos isla ya cu, aunke nos ta conta cu e ekipo necesario, mester a percura pa e personal por draai 24/7 cu tanto pashent. “Pero mirando e urgencia, y den hopi caso e riesgo di bida, nos ta haciendo e imposibel posibel; dunando e servicio aki na pashentnan cu nos a trece di St. Maarten,” Prome Minister Eman a bisa.

Algun di e pashentnan cu a yega Aruba den fin di siman tabata tambe pa motibo di operacion urgente. Pa nan tambe a regla tur aspecto di logistica. Gobierno di Aruba ta gradici tur instancia y individuo cu ta cooperando den e esfuersonan aki.