E argumento mas fuerte cu nos ta uza pa por covence votadornan pa un bez mas pone nan confianza den AVP ta cu nos ta brindando un vision di desaroyo social y infrastructural nunca bisto. Cumpliendo cu e vision aki ta mas cu claro cumpliendo cu e ideologia Cristian Democrata. Pa nos tur por continua cu e progreso bisto di e ultimo 8 añanan ta di suma importancia pa un bes mas deposita e confiansa den AVP paso en berdad ainda falta mas. A tuma hopi curashi y madurez pa a realisa tur e proyectonan y cambionan importante den maneho di e gobierno actual. Pa dicho rason, ta mi opinion cu e team experencia hunto cu e mentenan fresco riba lista cu bista of perspectiva nobo ta e unico garantia pa cu un Aruba progresando. Durante bishita di cas y encuentronan informativo ta sinti cu e pensamento y argumento aki ta wordo positivamente accepta.
Den mi humilde opinion, ademas di bon estudio y bon intencion, ta clave pa ta un bon politico prome cu tur cos ta consciente di kiko pueblo ta desea di mira pa nan pais. Na momento cu bo subi un lista politico, bo ta scoge pa ta un representante di pueblo y pa bo por cumpli cu nan necesidadnan, bo mester sa kico ta loke pueblo ta boga p’e. Partido AVP por medio di estudionan y plataformanan cientifico ta cumpli cu e punto clave aki na momento di desaroya nos plan di partido, PADILANTI.
Como hoben politico, mi lo desea di mira e arena politico na Aruba sigui desaroya den uno mas positivo y profesional. Nos pasado ta forma parti di nos presente y nos futuro. Nos no mag di lubida unda nos tabata, con hopi nos pueblo y barionan a progresa. Pa garantisa continuacion na e progreso bisto, confianza den AVP ta esencial pa sigui hiba Aruba padilanti, #CUPERSPECTIVANOBO !