Home » Refineria di Aruba N.V. ta instala den su oficina nobo

Refineria di Aruba N.V. ta instala den su oficina nobo

by sxm
0 comment 60 views

ORANJESTAD, Aruba: Refineria di Aruba N.V. (RdA) a instala su mes desde comienso di September den loke hopi conoce como e ex-edificio di DOOV na San Nicolas den Caya Dick Cooper. Den transcurso di e ultimo siman di Augustus, empleadonan di RdA y Fuels Marketing & Supply Aruba (FMSA) a cumpli cu un plan di mudamento pa asina tur operacion di tur dia sigui sin ningun interupcion. 

 

E trayecto pa remodela e edificio tabata uno largo ya cu e alcance di trabou tabata extenso despues di hopi añanan di abandono. E edificio remodela ta acomoda e team di RdA, FMSA, Aruba Safety Council, Departamento di Labor cu ta duna servicio na CITGO Aruba y tambe algun otro departamentonan di Gobierno.

 

E vision pa e edificio di RdA for di comienso tabata uno moderno, pero alabes cu ta resalta e construccion di glas existente. Actualmente e edificio ta den operacion den fase di un “soft-opening” ya cu falta pa finalisa algun cambio na e exterior di e edificio pa identifica e compania estatal y pues tambe algun cambio den e interior. 

 

E edificio ta consisti di 3 piso, di cual RdA, FMSA, Aruba Safety Council y Departamento di Labor ta ocupa e prome, diferente departamentonan di Gobierno y e cafetaria di e edificio ta na e di dos piso y por ultimo RdA y FMSA ta situa na e di 3 piso. E edificio ta uno cu ta marca accionnan importante den e mundo petrolero, como cu pa prome biaha den mas cu 90 aña Aruba ta doño di su refineria. 

 

Pa celebra e logro aki, riba dia 30 di September 2017 lo tin e apertura oficial di e oficina di Refineria di Aruba N.V. acompaña pa e inauguracion di e pagina web di RdA y FMSA. E anochi lo culmina cu e celebracion di e prome aniversario di e compania estatal Refineria di Aruba N.V. ya cu el a keda oficialmente estableci dia 1 di October 2016. 

 

RdA tin e concesion di e terenonan y ta doño di e facilidadnan di refinacion y ta supervisa e huurdo CITGO Aruba Refinery pa cumplimento di e diferente acuerdonan firma. Tambe RdA ta doño di FMSA cu ta responsabel pa distribucion y mercadeo di productonan petrolero riba nos isla.

 

Pa mas informacion por comunica cu Refineria di Aruba N.V. via su pagina di Facebook of por manda un e-mail na [email protected]

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio