ORANJESTAD – Renobacion di curriculum na scolnan di Aruba y continuacion cu digitalisacion di e metodonan pa duna les ta algo masha importante den Educacion. Gerlien Croes, candidata no. 19 di AVP, tabata presente den un conferencia di prensa di AVP dilanti di e edificio nobo di Prinses Amalia Basisschool, cu ta e ehempel di e modernisacion cu AVP kier logra den educacion na Aruba y unda cu a papia di e plannan pa cu Educacion den e proximo Gobernacion di AVP.
E joya di edificio di Prinses Amalia Basisschool, el a bisa, ta forma parti di idea unda cu AVP kier guia y hiba Aruba. E edificio di e scol aki, el a bisa, ta demostra e parti di innovacion, e base cu kier crea pa e desaroyo di conocemento na Aruba, ‘no solamente pa nos muchanan, pero tambe nos hobennan, nos grandinan. Como parti di e programa di e partido, nos kier sigui desaroya un pilar economico pa Aruba, un pilar di exportacion di conocemento. E crecemento y desaroyo di nosmuchanan y hobennan ta cuminsa for di chikito,” Gerlien Croes a expresa.
E ariba splica, segun Gerlien a bisa, ta e base cu AVP den Gobierno ta bay pone, ademas di continua cu renobacion di e infrastructura den Enseñansa. Ademas di esaki, mester sigui digitalisa e sistema di duna les, ekipa e scol y docentenan cu e hermentnan necesario.
Pero tambe el a bisa cu banda di introduccion di un “cluster 4 school”, na unda e muchanan por sigui scol normal y haya ayudo den cualkier problema di comportacion cu nan por tin, mester sigui inverti den educacion. Principalmente dun continuacion na proyectonan cu ta forma e comunidad, manera“Nos Atardi”, pero tamberebiba e centronan di bario. “Poco-poco mester crea e comunidad di conocemento, cual ta necesario pa sigui desaroya pais Aruba.”
Den e Programa di Partido den e seccion di Educacion, tin algun punto importante cu AVP ta bay concentra riba den e proximo Gobernacion y cu ta cay bou di e capitulo di: Renoba nos sistema di enseñansa.
Bou di e titulo di Renoba Sistema di Enseñansa tin 5 aspecto cu ta resalta: stimula uso di tecnologia den scol; mehora cooperacion entre docente-mayor-studiante; crea mas facultad na Universidad; Introduci mas scol pa muchanan cu necesidad special y elimina e sistema di ‘keda sinta’.