Mas y mas cerca nos ta yega di e fecha 22 di september, ta mas y mas pueblo ta mustra cu nan ta cla pa un gran cambio. Diadomingo na Centro di POR Pavia, tabatin accion di pegamento di sticker unda cu tabatin rij di auto henter dia pa pega ‘see through sticker’ na nan windshield di auto. E actividad a tuma luga den un ambiente hopi ameno y familiar.
Lider di POR Otmar Oduber ta gradici comunidad pa a asisti na Pavia pa demostra nan sosten na dje y POR. Ta realisa si cu e no ta facil pa tur hende demostra nan color y/of preferencia politico, teniendo na cuenta e diferente actonan di intimidacion cu ta tumando luga. Partido POR y su miembronan ta respeta opinion y desicion di cada ciudadano.
Candidatonan di POR tambe a bishita e actividad y a disfruta di dushi cuminda, prome cu nan a sali den grupo rond Aruba pa continua cu cumpli cu e peticionnan pa ricibi bishita di POR na nan cas. Diasabra tambe team di POR tabata tur rond di Aruba repartiendo corant cu inforancion di e plan di gobernacion di Vision 17 – 21 Hunto Nos Por. Cu e meta pa haci e contenido di e plan di gobernacion mas accesibel pa e ciudadano cu lo bay vota dia 22 di september pa e proximo representantenan di pueblo.