Home » Booshi Wever: PARTIDONAN POPULISTA NO TA HONESTO CU NOS PUEBLO Y NO TA INFORMA E GASTONAN CU PERSONANAN INDOCUMENTA TA COSTA NOS ISLA

Booshi Wever: PARTIDONAN POPULISTA NO TA HONESTO CU NOS PUEBLO Y NO TA INFORMA E GASTONAN CU PERSONANAN INDOCUMENTA TA COSTA NOS ISLA

by sxm
0 comment 57 views

 

Den e comedia titula “e Berdad”  Otmarcito el Santito a menciona cu na Aruba actualmente mester tin 10 mil personan ilegal di locual 8 mil ta trahando ilegal. Mi lo kier a ilustra cuanto e personanan aki ta costa nos pueblo, of cu nos ta perde di haña pa motibo cu keto bay tin comerciantenan cu ta burla di nos leynan, probablemente yuda pa esnan cu tin acceso na esnan di gobierno.

 

Na prome lugar e gasto cu e 400 pa 1000 hobenan cu no ta inscribi na censo, pero cu pa ley mester wordo permiti pa sigui enseñansa. Nan a haya e nomber di “dreamers”. Segun cifranan di CBS y Departamento di Enseñansa cada studiante tabata costa  na 2010 e suma di  promedio 15.624 florin pa aña, loke pa e grupo di hobennan aki so, ta nifica un suma di entre 6 pa 16 miyon florin.

Obviamente cu nos partido NUNCA lo perhudica e hobennan aki, mirando cu nan no tin e culpa. Pero no por ta e intencion tampoco pa sigui subsidia mas personanan indocumenta, mientras nos scolnan ta completamente yen, te cu mester traha mas, y nos AZV cu ta bou di presion.

 

E 8 mil ilegal cu trabou (segun Omarcito, el Santito) probablemente ta gana un salario menos cu un salario minimo. Esaki sin keha, pasobra nan ta na merced di e doño di trabou cu ta abusando di nan situacion precario. Door cu costo di bida ta halto na Aruba, e personanan aki lo trata na reduci nan gastonan. Nan ta huur un espacio hunto cu un grupo di persona, loke por nifica biba den un situacion inhumano y sigur no acceptabel segun nos normanan. E personanan cu drenta ilegal ta bin Aruba en busca di un entrada pa por yuda nan hendenan na nan pais di origen. Un gran parti di nan salario lo ta destina pa manda pa nan famia, loke nifica perdida di devisas tambe.

 

Pa loke ta salubridad,  e 10 mil ilegal no ta segura y no ta contribui na AZV. Pero na momento nan bira malo, nan lo haci uso facilidadnan medico ora. Hospital por ehempel no mag di nenga ayudo na e grupo aki den caso di un emergencia. E 8 mil ilegal cu si ta traha, tampoco ta contribui na AZV. Riba su mes no tin problema, pero si encaso nan wordo permiti pa keda legalmenta aki, anto di inmediato AZV lo mester brinda nan un seguro total, sin cu ningun screening debido pa evalua con nan salud ta. Pues SIN evalua si nan tin un malesa contagioso of cronico. Cada asegurado ta costa AZV pa aña  promedio 3665 florin. 8 mil persona extra den e caso aki ta nifica cu gasto di AZV lo por subi cu 29 miyon florin, mientras cu e prima cu wordo paga ta yega 1.5 miyon florin (8000 personan bes 180 florin, pa esnan cu salario minimo, loke mayoría lo tin).

 

E situacion ta bira pio, si tene cuenta cu momento cu legalisa e personanan aki, pasobra mester permiti entrada di nan famia tambe, cu lo por minimo un 24 mil hende mas. Un calculacion chikito ta mustra cu lo ricibi na prima di AZV e 1,5 miyon florin na prima pa cubri un riesgo di 32 mil (8 mil y 24 mil famia )bez 3665 florin (gasto promedio di un asegurado), cu ta e balente suma di  awg. 117.280.000,=. Ta esaki nos kier? Obviamente no ta tur 32 mil hende lo costa e suma di 117 miyon y pico, pero djis imagina bo mes cuanto esaki lo nifica pa e fondo di AZV, si solamente 1000 di e personanan aki tin un malesa cronico. Y esaki sin cu ni e cabes di famia, ni e doño di trabou, a contribui ni un cen preto na e fondo di AZV  y ni na a e caha di gobierno. Otmarcito, el Santito tabata sa esey, pero pa sigui djo djo den e gobierno, ela keda keto.

 

E gasto cu gobierno mester cubri djis pa salubridad y enseñansa so caba ta suma un montante halto. Aki no a tene cuenta cu otro posibel gastonan cu lo bin acerca pa nos comunidad. Loke ta repudiabel ta cu mayoria di e partidonan politico ta hunga mooi weer y pa motibo populista ta demonisa e Swiss model, mientras di otro banda ta cera wowo pa e realidad amargo cu e personanan aki mester soporta abuso pa motibo di nan posicion ilegal y hibando un bida inhumano aki. Nos “One Happy Island” di e forma aki a wordo reduci na un isla abusador y ta esaki PPA/UPP nunca lo acepta.

Ta p’esey nos ta boga pa re-introduccion di e Swiss-model den su bachi crioyo, pa garantiza cu nos tur cu ta biba riba nos baranca, e Perla di Mar Caribe, lo por sigui biba un bida digno y garantisa cu nos yiunan y yiunan di nos yiunan tambe tin e oportunidad ey. Ta p’esey nos mester yega na un Great Governance pa hiba nos pueblo pa e Siguiente Nivel pa garantiza un Miho Mañan pa un y tur.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio