ORANJESTAD – Den sala di prensa di Gobierno di Aruba a tuma luga un conferencia di prensa cu a conta cu presencia di Prome Minister Mike Eman y un delegacion di Cruz Cora consistiendo di Indra Anthony Pereira (Head of Operations & Marketing) di Rode Kruis, Fons Essed (miembro di e Hunta) y Marieta Wanopa tambe di Rode Kruis. Presente tambe tabata sr. Hermans di RampenBureau.
Durante e conferencia Prome Minister Eman a papia di e grupo di boluntario cu ta cla pa biaha pa Sint Maarten unabes cu tin conexion aereo of maritimo pa e isla y e telethon nacional cu ta bay organisa.
Comunicacion aworaki cu Sint Maarten, sra. Anthony Pereira a bisa, ta hopi dificil, pero cu mientrastanto ta haci e preparacionnan pa e delegacion di Aruba ta cla pa biaha cualkier momento. Na prome luga el a expresa agradecimento na tur e doñonan di trabou cu a duna nan nan cooperacion pa nan empleadonan por ta riba standby y biaha cualkier momento pa Sint Maarten. For di dialuna caba tabatin tres boluntario di Cruz Cora riba e isla pa cuminsa duna ayudo for di prome instante den maneho di e shelternan. “Mi ta pidi comunidad hopi pasenshi. Tin masha hopi yamada ta drenta na Cruz Cora, pero e comunicacion cu e isla mes ta hopi limita. Esaki ta causa cu e situacion ta cana hopi mas lento, pa manda cos y comunicacion. Nos ta haya yamadanan na cantidad puntrando pa nan famianan, door cu nan no tin contacto cu nan. Nos ta warda horcan Jose pasa, pa por haci un evaluacion di e situacion den e comunidad pa mira kico ta realmente necesario. Awa aworaki ta e prome necesidad y nos ta hayando masha bon cooperacion di comercio pa esaki. Nos mester warda riba yamada di Marina Hulandes riba e momento pa manda awa y cuminda.”
El a bisa den e proximo dianan lo informa comunidad na ki momento lo por cuminsa ricibi e mercancianan. Pero mester warda pa horcan Jose pasa den fin di siman. Pa loke ta e telethon, el a bisa cu lo dura algun siman pa haci e preparaconnan necesario.
Fons Essed di su banda a splica cu despues di diamars a bin logra un linea di comunicacion cu ta bayendo hopi dificil si. Ta haci esaki via di Marina, pero e tin cu cana su caminda prome cu e informacion por yega Aruba. E organisacion di Radio Amateur ta trahando pa lanta nan sistema di comunicacion pa di e forma aki esnan cu tin famia ayabou por logra haya mas informacion.