Home Uncategorized Raymond Hernandez, Candidato #4 Lista PPA/UPP NOS SISTEMA ELECTORAL Y BO...

Raymond Hernandez, Candidato #4 Lista PPA/UPP NOS SISTEMA ELECTORAL Y BO PODER DI VOTO!

SHARE

Den cuadro di nos tarea pa informa y educa nos ciudadania, ta importante pa nos di UPP para keto riba e poder cu bo voto tin durante un eleccion. Nos por scucha hopi den e dianan aki tocante nos sistema electoral y tambe henter e proceso di campaña. Keto bay mal informacion ta wordo treci padilanti, mientras cu hopi ciudadanonan ta expresa di  no tin e confianza mas den politiconan cu a cuasa e caos aki na Aruba, y cu p’esey nan lo no kier bay vota mas.

Riba su mes esaki ta algo comprendibel, pero nos tin di mustra si riba e hecho, cu loke nos ta wak pafo ey, riba caya, ta un competencia electoral di algun partido cu ta hincando hopi placa den campaña pa asina purba na influencia particularmente abo como votador cu tin duda. E pregunta cu nos tin di haci ta, si nos kier pa laga e decision di un proximo gobierno den man di solamente esnan mas fanatico, cu cueste  loque cueste lo kier pa nan partido t’esun cu lo bay forma e gobierno? Of abo, como ciudadano, cu e derecho di voto, no tin e derecho como fanatico di nos pais Aruba, como fanatico di gobernacion drechi, como un fanatico di cambio, pa tambe influencia con e siguiente gobierno ta bay ta hinca den otro?

Voto ta un derecho universal, unda den un democracia tur ciudadano, den un forma secreto, tin e derecho pa scohe su representantenan. Pero tambe  votamento di otro banda ta un acto unda e abo como ciudadano ta entrega bo derecho soberano di tuma decision na un otro, cu den bo nomber ta bay tuma decision pa bo, kizas hasta contra bo propio interesnan.  Hustamente e ultimo aspecto aki di entrega di bo derecho pa otronan dicidi pa bo, particularmente si como votador bo no tin pensa di eherce e derecho aki,  mester pone nos para keto un rato na loke ta nos sistema electoral.

Atrobe nos por scucha awe, despues cu un candidato ta desmenti cu lo tin un posibel acercamento entre POR y MEP, cu nan no mester di traha cu ningun partido, pasobra nan ta bayendo pa un mayoria absoluto. Ta bon pa splica aki cu un mayoria absoluto ta 11 asiento bay ariba. Mientras cu 14 of mas asiento ta nifica un mayoria cualitativo. E realidad di nos sistema electoral ta cu e parlamentonan cu a sinta a base di mayoria absoluto, a haci esaki a base di restzetel. Sigur na 2005 y na 2009, e gobiernonan basa riba un mayoria absoluto a sinta cu 43 y 48%  di e votonan respectivamente. Cu otro palabra un gabinete cu un sosten di minoria di electorado ta goberna a base di mayoria. Esaki ta loke nos sistema ta duna.
P’esey UPP ta kere cu nos sistema mester un revision na unda cu realmente nos por bay na cambia e sistema di representacion y democratisacion di nos eleccion.

Ta keda naturalmente den man di e pueblo votador. E ta esun soberano cu sa kico y con e ta haci cu su voto. Pues si abo como votador ta cansa di nos sistema politico, ta tempo pa pensa pa cuminsa cu cambio di e reglanan di wega, dor di no permiti pa bolbe bin un gobierno di mayoria absoluto. Pesey UPP ta kere cu keda sin vota, lo no ta un opcion. UPP ta kere ta tempo pa nos bolbe bin cu un coalicion. Nos ta kere cu esaki lo hiba na un mihor control.  Duna bo sosten, na e.o. nos lista combina di PPA/UPP, y asina inicia e cambio di reglanan. Y na momento cu nos combinacion ta den Parlamento, nos lo haci tur loke ta na nos alcanse pa bin cu cambionan fundamental den nos sistema di eleccion y representacion den Parlamento. Di e manera aki tambe nos por logra na mehora e funcionamento di Parlamento. P’esey Bo VOTO ta importante dia 22 di september proximo, pa asina Level Up nos Aruba Pa Un Miho Mañan.

 

 

Den nomber di Union Patriotico Progresista – U.P.P.

Raymond Hernandez – Secretario