Partido MEP y su dirigentenan a tuma nota di un declaracion di sr. Jan de Ruyter, den cual ta involucra partido MEP y candidatonan di MEP, den un problema personal entre e y un otro persona. Den su declaracion na ministerio publico, sr. de Ruyter a skirbi e insinuacion cu MEP lo ta tuma placa di un comerciante pa bay goberna cu POR.
Lider di partido MEP categoricamente ta nenga e insinuacionnan aki. “Partido MEP ta un partido di pueblo y pa pueblo. Fondonan cu nos partido ta ricibi ta bin di e actividadnan di fundraising cu nos ta organisa. Na e momento aki mes nos ta organisando e di tres rifa di e aña aki, aparte di tantisimo koffie morgen y otro actividadnan pa recauda fondo.
Aparte di tur esaki e candidatonan mes ta haci nan actividadnan pa recauda fondo pa por cubri e gastonan di campaña. Nos ta haci esaki especialmente pa no mester depende di ningun comerciante.
E insinuacion cu nos lo a tuma fondo pa por forma gobierno cu partido POR ta un insinuacion falso. MEP ta trahando duro awor pa gana e eleccion aki. Si pueblo dicidi cu mester bin un coalicion, nos lo atende cu e deseo ey di pueblo e ora ey. Awor no tin ningun sentido pa yega na ningun palabracion pa coalicion, y lo ta hopi estupido si nos haci esey.
Den su declaracion, sr. de Ruyter a menciona cu ami, y mi coleganan Glenbert y Dangui lo a lunch cu un comerciante e siman aki, cual tambe ta incorecto.
Mi a splica sr. de Ruyter tur esaki, y mi a pidi’e pa tene MEP y mi persona for di cualkier problema personal cu e por tin cu otro hendenan. Mi ta lamenta cu nos prestigioso partido, y nos como candidato, ta wordo involucra den e asunto aki den cual nos no tin arte ni parte.
Mientras tanto nos no ta laga esaki desvia nos atencion, nos campaña ta bayendo hopi bon, y nos mensahe ta yegando tur caminda. Mientras otronan ta keda den campaña negativo di ataca y lastra hende, nos ta sigui trece speransa y solucion, lider di MEP Evelyn Wever-Croes a duna di conoce.