Home Uncategorized Minister di Enseñansa, Michelle Hooyboer-Winklaar MoU firma cu Humber College ta continua...

Minister di Enseñansa, Michelle Hooyboer-Winklaar MoU firma cu Humber College ta continua e diversificacion pa nos studiantenan

SHARE

ORANJESTAD, Aruba: Ministerio di Enseñansa a firma un MoU cu Humber College di Canada. Esaki ta e di 6 acuerdo firma cu un institucion superior di Canada, banda di e 4 acuerdonan firma cu varios scol na Merca cu ta cumpli cu e deseonan di diversificacion pe studiantenan di Aruba por tin mas escogencia pa programanan na nivel di University y College. Minister di Enseñansa, Michelle Hooyboer-Winklaar tabata contento di por a finalisa e di 10 acuerdo, y un ultimo prome cu e termina su trabou como Minister di Enseñansa.

 

Minister Hooyboer-Winklaar a duna bon bini na e partnernan y na Victor Stott di e Embahada di Canada na Venezuela. Victor Stott a yuda cu organisacion di e EduCanada Fair cu a tuma luga e siman aki, banda di varios encuentro cu scolnan na Canada durante e ultimo 4 aña. Hunto cu Victor Stott y Minister Hooyboer-Winklaar, tabata presente un representante di Humber College. E representante a bin Aruba cu tur documento firma door di e presidente di e College.

 

E acuerdo aki ta representa diferente beca cu lo ta disponibel pe studiantenan a base di nan GPA y e tipo di programa cu e studiantenan lo scoge. E acuerdo aki ta uno un biaha mas cu ta duna studiantenan diferente beneficio cu kisas no ta existi pa otro studiantenan den region. “Pa nos e ta algo cu ta habri diferente porta, diferente oportunidad pa nos studiantenan”, e mandatario a duna di conoce. E studiantenan ta haya e oportunidad di sigui nan estudio na e nivel aki na un pais cu pa Ministerio di Enseñansa ta importante pa crea opcion aki. A mira cu studiantenan kier tin varios opcion, di cual nan no kier tin simplemente 1 of 2 pais cu nan por scoge. Nan ta haya e espacio pa explora y scoge e programa, pero tambe e pais cu pa nan ta uno cu ta fit mas miho.