Home Uncategorized Jacky van Putten #11 POR Mas di e mesun of un cambio...

Jacky van Putten #11 POR Mas di e mesun of un cambio di maneho den deporte

SHARE

Si mi tin cu indentifica e problema mas grandi di deporte, esey ta e maneho. Den trayecto di mi añanan mi a maak mee esaki. Mi a traha bou di  maneho di 7 diferente minister di deporte y cada bes ta resalta cu manehonan ta wordo cambia sin tene cuenta cu loke esun prome a bin ta desaroyando. Bo ta haya ministernan cu kisas a forma parti di un deporte pero nunca a prepara nan mes den maneho di deporte riba un nivel nacional. Pa falta di experencia nan ta depende riba conseho di coordinadornan cu den mayoria di caso ta liga na partido of tin interes personal, pesey tanto bululu den Lotto pa Deporte, subsidie commissie y federacionnan. Pa decenanan di aña mi mester a para wak con fondonan ta wordo gasta sin ningun programa of maneho. Sin consulta placanan ta bay den tur direccion cu aprobacion di ministernan sin  ningun contabilidad transparente. Di un banda federacionnan no ta haya ayudo pasobra nan administracion no ta cuadra y di otro banda ta otorga otronan cu ni tin federacion. Tur ta bin bek cu falta di vision y un maneho a corto plazo y pa un periodo largo. Pa haci e situacion mas tristo, semper kier inventa e wiel di nobo, cu yen di show, ideanan nobo cu na final ta un fracaso di maneho y un perdida enorme di recurso humano y financiero pa nos deporte. Na 2009 bou di minister Visser deporte  organisa a haya un golpi duro na unda innovacion a caba cu maneho y programanan cu a duna resultado pa añanan a wordo para. Restructuracion di IDEFRE a conduci na caba cu un maneho di deporte na nivel nacional y escolar. Practicamente a para tur mantencion di facilidadnan y programanan importante pa hubentud y scolnan basicio y secundario a sufri. Si nos compara añanan prome cu 2009 y despues bo por mira un falta di maneho total. Prome cu 2009 por a mira cu toch tabatin cierto atencion pa deporte unda tabatin construccion, renovacion y implementacion di ideanan cu resultadonan positivo. Despues di 2009 por a mira tal cual proyecto, manera Linear Park cu ta uno cu a wordo ehecuta bou maneho di ex Minister Otmar Oduber, pero mas tanto por a mira proyectonan cu a fracasa manera Extreme Sport y Coco Fun Festival. Loke a resalta ta con a para e desaroyo deportivo manera eliminacion di olimpiada escolar y instruccion den bario, a para entrenadornan Cubano, material pa scolnan a stop, a perde contactonan internacional pa deporte. Esaki bou maneho di ex minister Visser y bou Minister Schwengle e falta di maneho a continua aunke e mes ta reconoce cu e no a haci nada e prome 3 aña y mey ya cu su dedicacion tabata pa e cartera di salubridad (cual ta hopi cuestiona tambe). Ultimamente por mira cierto movecion door di minister di deporte, cua ta di aplaudi pero mi ta keda cuestiona ki importancia deporte tin pa gobierno cu faltando 5 pa 12 ta core dune atencion.

Un bon resultado ta tuma tempo, crea un cultura consciente di movecion y deporte ta rekeri un vision a largo plazo y continuidad den maneho . No por sacrifica nos hobennan awe cu ta nos futuro, pasobra no ta interesa of no a dedica tempo pa e maneho integral. Con nos kier nos hubentud bira saludabel? Ministernan di Salud claramente a mustra cu deporte no ta interes primordial di nan.

Vision 17-21 Hunto Nos POR:

  • Restructura y profesionalisa Instituto Biba Saludabel y Activo (IBISA) pa asina e instancia aki por duna mas atencion y enfoke na desaroyo di nos sector di deporte. Prome tarea di IBISA “estilo nobo” lo ta pa formula un maneho integral pa deporte cu envolvimento y participacion di tur stakeholder.