Home Uncategorized Refineria di Aruba N.V. a organiza un Encuentro cu nos Baluartenan di...

Refineria di Aruba N.V. a organiza un Encuentro cu nos Baluartenan di Refinacion di Petroleo

SHARE

Oranjestad, Aruba: Diasabra ultimo Refineria di Aruba N.V.
(RdA) a organiza un evento dedica specialmente na e baluartenan di refinacion di petroleo
na Aruba. E lista di invitado tabata consisti di ex-trahadornan di Lago Oil & Transport
Company, Coastal Aruba Refinery, Valero Aruba Refinery y tambe nan respectivo
companianan di Marketing & Supply. E mainta tabata yena cu emocion ora cu coleganan a
reuni na un lugar special—cu ta den parkinglot di ex Esso-club (Nanki) den ora nan di
mainta, pa asina reviva y comparti algun memoria y anectodonan trahando pa decadenan
den refineria.

E team di RdA y Fuels Marketing & Supply Aruba N.V. (FMSA) tambe tabata tey
presente pa asina por a sera conoci mas di cerca cu esnan cu a percura pa mantene
operacional un di e pilarnan economico vital di nos isla. Ta importante pa menciona, cu
varios di e miembronan di e equipo di RdA y FMSA no ta cara nan desconoci den e mundo
petrolero y tabata un placer pa encontra cu nan ex-coleganan.

Pa yama boni bini a cuminsa cu bebida y snack sigui pa un discurso, despues e
invitadonan tabata tin e oportunidad pa combersa cu tur esnan presente. A sigui un brunch
fenomenal y a finalisa e programa di dia cu un discurso duna pa Sr. Alvin Koolman,
Managing Director y CEO di Refineria di Aruba N.V. cu a elabora un tiki riba e compania y
plannan pa futuro. Sr. Koolman a brinda na mes momento e oportunidad pa esnan presente
hasi pregunta riba e structura nobo di Refineria di Aruba y a elabora mas detaya di e
trayecto di negociacion cu a culmina na re-apertura di nos refineria. Awe 93 aña despues
Aruba por disfruta di un fundeshi solido di experiencia danki na esnan cu a crea esaki. Ta
importante pa reconoce nos hende nan cu a traha cu dedicacion pa hiba pais Aruba dilanti.

Durante e evento tabata tin fotografo y camarografo presente pa documenta cada
momento special pa RdA. Hopi tabata e comentarionan positivo. “Danki pa organiza un
evento asina unico aki pa nos”, Sr. Ramon Buckley a comenta ora cu a entreviste riba su
experiencia den refineria na Aruba y den exterior. “Mi ta recomenda tur hoben cu ta
interesa pa traha na Refineria pa aplica, paso ami mes tin recuerdo involvidabel na
refineria, ta loke Sr. Adolf “Dufi” Kock a comenta durante su entrevista. RdA tin intencion
pa organiza mas di e tipo di evento nan aki pa brinda e espacio pa tur experto den mundo
petrolero por intercambia experiencia y ideanan den un ambiente ameno manera tabata e
caso diasabra ultimo.

Gobierno di Aruba a funda Refineria di Aruba N.V. riba 1 di October 2016. RdA tin e
concesion di e terenonan, ta donjo di e facilidadnan, ta supervisa e huurdo, Citgo Aruba
Refinery pa cumplimento di e diferente acuerdonan firma. Fuels Marketing & Supply Aruba
N.V. desde 1 di october 2016 ta resorta bou di Refineria di Aruba N.V.