ORANJESTAD – Na ocasion di e inauguracion oficial di servicio di WiFi gratis den Caya Grandi, Prome Minister a tuma oportunidad pa trece den bista e imagen completo di trabounan cu ta haciendo pa stimula mas circulacion di publico y aumento di actividad comercial. Fuera di e renobacion fisico y facilita inversion, Gabinete Mike Eman ta trahando riba detayenan idea pa complementa e experiencia di haci compras den centro di ciudad.
E proyecto di WiFi ta casi completa, mientras cu su tras ta bin caba e instalacion di un sistema di zonido cu lo trece ambiente musical constantemente pa e bishitantenan di Caya G.F. Betico Croes. Fuera di esey, ta papiando cu e doñonan di edificio pa haya nan cooperacion pa pone lonanan grandi di un banda pa otro cu lo ofrece sombra; algo particularmente necesario den e lunanan calor di aña manera esnan cu ta nos ta pasando aden awo.
Dos di e tres areanan di WiFi gratis ya ta cla, e ultimo ta pendiente pa aprobacion di tiendanan pa loke ta e instalacion di e aparatonan necesario. Esaki ta e proceso cu a tuma mas tempo y esfuerso pasobra hopi biaha e comerciante den caya ta un huurdo y no por duna, su mes, e autorisacion pa haci conexionnan tecnologico riba e edificio.
E siguiente fase ta e diseño di un canape cual ta un sistema cu lo trece sombra den Caya Grandi cu diferente lona di colo di punta pa punta den caya grandi, pero cu lo ta un parti importante riba e fachada di e edificionan y nos ta den proceso pa aprobacion. “Mi ta sigur cu, cu un poco mas di sombra, lo bira mas atractivo den oranan di dia,” Premier Eman a expresa. “E otro parti importante ta esun di e pregunta riba extension di orario y gobierno ta facilitando esey caba.”
Colega di Asuntonnan Economico drs. Richard Arends a splica cu un total di 60 peticion di comerciantenan a keda otorga pa por habri te 11’or di anochi. Ta keda awo na e propio maneho di e tiendanan pa haci uso di e posibilidad aki. “Tur peticion cu bin aden, ta wordo honra,” asina Minister Arends a splica poniendo enfasis cu Gobierno ta apoya pa tiendanan alarga den oranan di anochi nan operacionnan pa facilidad di cumpradornan y pa trece mas ambiente den Caya Grandi.
Por ultimo, Prome Minister Eman a duna di conoce cu actualmente ta realisando e trabounan di instalacion di sistema di zonido cu ta pasa den e infrstructura bou di caminda y cu pa fin di aña e lo ta cla. “Den luna di december y net pa e temporada di Pasco cual ta un tempo importante pa e tiendanan, lo tin un soundsystem y wifi. Probablemente lo cuminsa tambe cu e prome fase di e lona cu ta bay poniendo pa duna mas sombra den Caya Grandi,” asina Premier Eman a duna di conoce.