Home » Minister Sevinger na apertura di brug na Spaans Lagoen “Nos ta celebra un era nobo den historia di Aruba”

Minister Sevinger na apertura di brug na Spaans Lagoen “Nos ta celebra un era nobo den historia di Aruba”

by sxm
0 comment 52 views

ORANJESTAD – Miles y miles di persona tabata presente diabierna anochi riba e brug nobo di Green Corridor, den un celebracion organisa door di e constructor ODINSA pa e echo cu e infrastructura aki cu ta conecta pariba cu pabou a keda cla. “Nos ta aki pa celebra un era nobo pa Aruba,” Minister di Infrastructra Benny Sevinger a bisa den e parti oficial di e anochi.

E tabata un anochi yena di emocion cu un proyecto asina importante pa desaroyo di Aruba y pa e bida social di su hendenan a keda finalisa. E brug, e mandatario a señala na diferente occasion den su discurso no ta un simpel structura, pero cu tin efecto riba e ser humano den diferente aspecto. “Awe nochi ta un anochi pa nos celebra. Un anochi cu nos a bini hunto pa algo historico. Nos a bini hunto pa celebra un era nobo den nos pais, un era nobo unda cu desaroyo positivo ta bay marca e pautanan pa futuro. Awe nochi nos a bini hunto pa conecta Oranjestad cu San Nicolas un biaha mas,” e mandatario a bisa na e miles di persona presente den e celebracion.

E mandatario a expresa su pensamento riba e aspecto di trafico, cu e via di Green Corridor aki por mehora e siguridad den trafico tambe. Loke ta bay yuda inmensamento ta cu vehiculonan no ta bay topa frontal cu otro mas.

Pero tambe el a recorda cu ta 30 aña pueblo a warda pa e proyecto aki wordo realisa. Pesey el a bisa “Gobierno a priminti, y Gobierno a cumpli.” Ora ta papia di e proyecto di Green Corridor, e ta bay mucho mas leu cu un brug, asfalt of klinker. E ta un proyecto ta conecta dos parti di e isla cu otro. “E ta un proyecto cu ta trece calidad di bida pa nos hendenan cu ta biba na San Nicolas. Cada seconde, minuut,of ora extra cu nos hendenan di San Nicolas haya extra pasobra nan a yega mas lihe trabou, ta tempo cu nan por dedica na nan famia. Esey ta calidad di bida pa nos ciudadanonan. Pesey e brug y e proyecto aki t’sina importante pa nos pais.” El a sigui menciona e desaroyo riba henter e ruta di Green Corridor unda dilanti e casnan a haya klinkers of asfalt cu ta contribui na calidad bida di e ciudadanonan pariba di brug. “Nan merece, nan tambe merece e desaroyo. Pabien Aruba, Padilanti nos ta sigui. Cu Dios mediante y cu ayudo di pueblo nos lo sigui construi un miho Aruba pa nos tur,” el  termina bisando

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio