E esencia di salario minimo pa POR ta un “Entery Level Income”. Un salario minimo ta un salario cu ora un persona hoben cuminsa traha, e minimo cu e lo gana. E meta di salario minimo no ta pa un persona bay biba decadas cu mesun salario minimo. Actualmente un impresa ta paga 25 % di winstbelasting. Pa stimula aumento di salario minimo sin cu mester bin cu inflaccion, POR lo brinda comerciantenan un taza di winstbelasting mas abou si nan prueba cu den nan payroll, cu nan a duna aumento riba e salario minimo. Por ehempel 20 % di winstbelasting enbez di 25 %. Pa medio di un estimulo fiscal ta duna comerciantenan riba nan mesun bon boluntad e escohencia pa duna aumento riba salario minimo. Asina e e salario minimo enrealidad lo bira un “Entry level income”.
Bestaansminimum (costo di bida) ta wordo influencia door di 10 factor. E 10 factornan ta: 1. Cuminda y bebida, 2. Paña y sapato, 3. Gastonan di vivienda, 4. Acesorionan pa cas, 5. Salubridad, 6. Transporte, 7 Comunicacion, 8. Recreacion, cultura y desaroyo, 9. Educacion, 10. Otro bienes y servicionan.
Na Aruba tin un canasta basico cu ta consisti di 11 producto cu e prijsnan ta wordo stipula y controla pa gobierno. E 11 productonan ta: aros, hariña, sucu, babyfood, lechi pa baby, koffie, te, margarina, manteca, lechi di polvo y lechi liquido pa koffie. Riba tur e productonan cu ta pertenece na e canasta basico tin cu paga impuesto indirecto (BBO / BAZV) momento di hasi compras. Prijsnan cu tambe ta wordo calcula pa gobierno ta: pisca, galiña, webo y pan blanco.
Si tuma un di e factornan cu ta influencia e bestaansminimum cu ta cuminda y bebida, berdura y fruta ta productonan cu no ta paga invoerrechten pero, impuesto indirecto ta wordo poni riba e prijs momento di hasi compras. Pa medio di elimina impuesto indirecto riba (sierto) factornan cu ta influencia bestaansminimum lo hasi cu e bestaansminimum lo ta menos cu ta actual. Pa medio di un comunicado di CBS por mira cu na luna di july 2017 e bestaansminimum ta pa:
- un adulto Afl 2.053,-.
- dos adulto y 2 yui Afl 4.311,-.
Un persona adulto cu ta gana salario minimo ta bin cu mas o menos Afl 1.650,- netto pa luna cas. Cual ta señala cu tin un diferencia di Afl 403, – mensual.
Rebaha winstbelasting na impresanan pa stimula salario minimo y elimina impuesto indirecto riba (sierto) factornan cu ta influencia e bestaansminimum, ta hasi cu gobierno lo tin menos entrada na impuesto. E situacion ta hasi cu como gobierno mester traha na prome lugar pa mehora e parti economico pa por tin mas entrada.
Pa medio di mehora economia, ta bay tin mas variacion den empleo y cu miho salario. Door di crea mas empleo cu mihor salario, cuidadanonan por hasi mas compras. Pa mehora e economia POR lo:
- expande turismo pa medio di fast ferry entre e islanan Aruba, Boneiro y Corsou.
- introduci pilar economico nobo cu ta e curason di Fourth Industrial Revolution.
E combinacion di stimula salario minimo y elemina impuesto indirecto riba (sierto) factornan cu ta influencia bestaansminimum lo brinda comunidad un miho poder di compra. Cual cu lo percura pa salario minimo y bestaansminimum jega otro. Na mesun momento ta kita e presion cu mayornan tin cu traha mas cu un trabou pa cumpli cu nan debernan. Unda cu e mayornan tin mas tempo pa nan yuinan y lo contribui pa evita problemanan social den comunidad.