Home Uncategorized Evelyn Wever-Croes: Pueblo no por sigui carga berguensa den Reino Mike Eman...

Evelyn Wever-Croes: Pueblo no por sigui carga berguensa den Reino Mike Eman mester haci loke ta corecto y retira Paul Croes

SHARE

Den e acostumbrado rueda di prensa di Partido MEP, un biaha mas lider di MEP, Evelyn Wever-Croes a elabora riba e tema di Paul Croes y e berguensa cu e situacion aki a pone riba nos pais den Reino. Sra Wever-Croes ta declara lo siguiente:

 

“Pa prome biaha den historia di Aruba y di Reino Hulandes, tin un minister cera den prison. Esta, Paul Croes. E echo aki ta daña e imagen y integridad di nos pais Aruba. Los di e persona, e ta bay pa e echo. Como un pueblo esaki mester wordo rechasa, pasobra e berguensa aki por a wordo evita si hendenan cu escrupulo y fatsoen politico a tuma nan retiro na e momento cu nan mester a haci esaki. Mester sa kico por pusha bay na extremo y kico no.

 

Ora un persona ta inocente di algo, e ta defende su inocencia, pero no ta busca pa pone henter un pueblo pasa berguensa. Na e momentonan aki, Aruba ta e centro di berguensa den Reino. Tur otro paisnan di Reino, prome cu un minister yega asina leu di wordo cera den prison, e ta tuma su retiro. Aki na Aruba esaki no a pasa den e caso di Paul Croes”.

 

Sra Wever_Croer a laga sa cu Fraccion di MEP a manda un carta pa Prome Miniseter Mike Eman na unda ta pidi’e pa e haci lo corecto. Pa e caba cu e situacion di berguensa cu e y su gobierno a pone Aruba aden den bista di Reino. Y esaki ta implica pa retira e minister for di su funcion.

 

“Di tur manera, Minister Paul Croes ta keda haya overbruggings toelage pa un aña. Cu otro palabra, e situacion aki no ta bay pa e placa. E ta bay cu gobierno ta prefera di keda den nan terkedad y keda mantene un persona cera den KIA como minister. Esaki ta algo hopi malo cu ta duna un señal di degeneracion den nos norma y balornan.

 

Esaki tambe ta keda un situcion inhusto pa cualkier otro ambtenaar cu haya su mes envolvi den algo asina, nan si lo wordo retira mesora sin wordo duna un otro oportunidad.

 

Pa e motibo aki tambe nos a pidi Mike Eman pa tuma cargo di e situacion y tuma un decision. Si e no haci esaki, nos lo bolbe acudi na di Presidente di Parlamento pa e yama un reunion publico pa trata e tema aki.

 

Fraccion di MEP ya caba a haci tres peticion pa yama reunion publico pa trata e tema aki den Parlamento. Sinembarbo esaki nunca a wordo yama, pero si a wordo trata den pura den un reunion publico cu Parlamentario Desiree Croes a pidi pa un tema diferente. Aki nan a plak den pura e tema di Paul Croes tambe, sinembargo asina mes nan no tabata kier a trata e tema di Minister Paul Croes.

 

Den un otro reunion cu a wordo yama pa trata e ley di integridad di Marlon Sneek, a menciona e caso di Paul Croes. Pero esaki a bira un ley cu menos integridad cu tin pasobra e la wordo traha pa acomoda e minister cu ta bou di investigacion.

Den e reunion publico cu nos lo pidi, nos lo realisa kendenan ta esnan cu ta para na banda di hende drechi y di fatsoen corecto y kendenan ta esnan cu lo para banda di esnan cu no tin fatsoen, sin berguensa y sin escrupulo. Aki ta unda cu Presidente Mervin Wyatt Ras mester fiha su posicion unda e ta bay para. Sea e ta pone respet, norma y balor y integriad na e nivel cu e mester ta, of e ta bay hunto cu esnan corumpi y putri den su gobierno cu no kier trata e tema aki.

 

Sra Wever-Croes a conclui enfatisando: “Investigacion penal ta sigui su curso y nos di Partido MEP no kier interferi den ningun manera den e investigacion penal. Esaki ta den man di Ministerio Publico y e minister y su abogado. Nos no por mete den esaki, pero nos kier papia di integridad di e nomber di Aruba y pa e berguensa cu nos ta den, por wordo kita. Nos ta sigui haci nos trabou y ta para na banda di integridad”.