Home Uncategorized Kinsasha van der Bliek (ReD Democratico): Legalisacion ta rekeri vision!

Kinsasha van der Bliek (ReD Democratico): Legalisacion ta rekeri vision!

SHARE

Den fin di siman mi por a tuma nota di un articulo for di den seno di POR cu a purba na toca e thema di legalisacion di cannabis. Ta di remarca cu e author ta keda SIN husa specificacion cu RED Democratico ta para pa legalisacion di cannabis y NO droga en general. Asina purbando di manipula y demonisa nos lider y partido di RED Democratico.

E articulo aki ta prueba con otro partidonan kier djis hunga politica y no tin comprendimento y tampoco vision ora ta toca e thema di legalisacion di cannabis y mucho menos cannabis medicinal y a djis tuma e topico aki over den un manera populista pa core campaña cune.

E punto di bista den e articulo publica ta uno cu ta substancia ta locual ta hiba na drogadiccion. Si e theoria aki ta uno real e ora ta hypocrecia di cualkier partido cu ta para pro cannabis medicinal pero contra cannabis recreacional husando e argumento aki. Den ambos caso, recreacional y medicinal e ta keda e mesun mata, e persona ta ingeri of huma ambos componente presente den e mata, cual ta THC y CBD. Aunke den caso di cannabis medicinal e nivel y proporcion di e componentenan aki ta wordo manipula pa personalisa e medicina na e malesa, ambos componente TA presente, a wordo prueba cu e combinacion di ambos componente ta mas efectivo pa trata cualkier malesa. E ora tambe den palabra y segun theoria erroneo tresi dilanti den e articulo di sra. Croes nos lo tin cu preocupa cu patient di cannabis LO bira adicto cu nan ta desea esaki of no. E pensamento aki ta completamente robes.

Tanten cu cualkier otro partido NO compronde adiccion, ni maske cuanto empeño, nan lo NO logra alivia y/of soluciona e problematica di drogadiccion. Sra. Croes ta menciona pa por inclui den sentencianan oportunidad pa persona nan cu ta adicto na substancia pa bay rehabilita pero ta lubida di menciona cu esaki den algun ocasion ya ta sosode si tin luga den centro, pero tambe cu e mesun persona nan aki ta bolbe cay den adiccion y circuito di crimen. Esaki mester ta indicacion fuerte caba cu e systema cu nos ta conose te cu awo pa atende cu drogadiccion NO ta funciona.

Drogadiccion no ta descrimina den cultura, capacidad intelectual of clase. Estudionan profundo y nobo ariba drogadiccion ta exsisti caba y no lo tin cu gasta mas tempo pa cu esaki. E estudionan aki ta den direccion den compronde adiccion como consequencia di un estado emocional y psychologico instabiel. Ta ora pa accepta resultado nan publica y stop di purba inventa e wiel di nobo y pa stop di hunga politica cu un topico cu nan no tin ningun conosemento profundo di dje.

Un di e publicacionan pa por husa como guia y pa expande perspectiva ta e Drug and Crime reports anual di Nacionan Uni. Den e ultimo decada, den cual tabata tin hopi desaroyo positivo ariba legalisacion y decriminalisacion di cannabis y den algun pais otro substancia tambe, e percentaje di persona cu ta sufri di drogadiccion a keda stabiel bou di 1% di e populacion mundial. Y e percentaje di persona cu a hasi uso di droga ocasionalmente a keda stabiel entre 4.6%-5.3%

Esaki ta dunabo un indicacion fuerte caba cu decriminalisacion y legalisacion NO a hiba na un aumento di drogadiccion y tampoco a hiba na uso escala di cannabis y/of otro substancia.

Otro estudio profundo independiente hasi durante un periodo di 3 aña ta di Jan Harris cu a compila su resultadonan den su buki “Chasing the Scream” cu ta duna un bista profundo den drogadiccion y con prohibicion tin un influencia negativo ariba esaki. E estudio aki ta duna un perspectiva ariba con paisnan mester cuminsa atende adiccion for di un otro angulo pa por ta exitoso pa cu esaki. Ehempelnan ta abundante con legalisacion a aporta na un reduccion di adiccion, criminalidad y tambe malesnan manera HIV y hepatitis C transmiti durante uso di droga injecta. Portugal ta un ehempel recien y bibo cu legalisacion combina cu regulashon tin efecto positivo ariba desminui adiccion y baha riesgonan relata cu uso di droga. 

Nos ta lamenta cu otro partidonan ta core campaña populista cu topiconan asina delicado pero cu nan no ta tuma nan tempo pa studia esakinan den profundidad y crea vision cu ta uno duradero. RED Democratico ta E partido visionario den hopi aspecto y topico cu ta concerni nos comunidad. Cannabis medicinal ta un di e topiconan aki. Y den e campaña electoral aki nos tur por tuma nota cu RED Democratico ta lidera den vision y pesey tambe cu otro partidonan ta adopta e ideanan visionario y progresista di RED Democratico. Pero no permiti bo mes wordo manipula den kere cu e otro partidonan aki lo por ehecuta cu excelencia un vision cu NO a nace di nan mes. RED Democratico ta E partido indica pa ehecuta efectivamente y excelentemente NOS visionan cu otro partidonan a bin ta tuma over pa core campaña populista cune.