Home » Recordando e accionnan di Augustus Scur: Dia 3 di September 1977 un delegacion Arubano a sali pa Hulanda cu e meta principal pa sigui lucha pa nos Status Aparte

Recordando e accionnan di Augustus Scur: Dia 3 di September 1977 un delegacion Arubano a sali pa Hulanda cu e meta principal pa sigui lucha pa nos Status Aparte

by sxm
0 comment 72 views

Despues di e accionnan durante Augustus 1977, porfin Hulanda a dicidi di duna atencion na e lucha di e pueblo Arubano pa su libertad, esta su Status Aparte. E accionnnan tabata e ultimo recurso cu e pueblo Arubano tabata tin pa demostra su frustracion, disgusto y desaprobacion pa cu e formacion di Gobierno Central lagando e partido mayoritario MEP afor y e actitud negativo di Hulanda pa cu e deseo di e pueblo Arubano pa su Status Aparte.

 

Hulanda a habri porta

Despues cu Bestuurscollege a ricibi un telegram for di Prome Ministro Hulandes Joop den Uyl participando cu Gobierno Hulandes ta dispuesto pa ricibi un delegacion Arubano pa papia tocante e futuro estatal di Aruba, un reunion di Eilandsraad a wordo convoca riba 19 di augustus 1977. Durante e reunion aki un mocion entrega door di partido MEP a wordo aproba unanimamente. Durante  e reunion aki tambe varios miembro a haci uso di e oportunidad pa expresa nan disgusto pa e manera humiliante den cual e pueblo di Aruba a wordo trata door di e Riot Comando manda for di Corsou. E comportacion bruto y falta di respet pa parti di e agentenan di e Riot Comando, incluyendo e tiramento riba ciudadanonan inocente y sin arma indudablemente a contribui tambe na e cambio den e actitud di parti di Hulanda pa cu e deseo ferviente di e pueblo Arubano pa su libertad.

 

Miembronan di delegacion

En todo caso, cumpliendo cu e mocion di Eilandsraad, Bestuurscollege a forma un delegacion pa bay delibera cu Gobierno Hulandes y e siguiente miembronan a keda nombra: G.F. (Betico) Croes, lider di e delegacion; miembronan di Eilandsraad D. Leo, G. Bareño, C. Lacle, P. Kelly, R. Richardson, W. Vos y S. Spanner. Como conseheronan a wordo nombra diputado J. v/d Kuyp y e siguiente representantenan di e sindicatonan Arubano: J. Quijada (GWU), M. Malmberg (ANAAB), R. Hoek (UPA), S. Harms (UEA) y M. Croes (VWA). Tambe representantenan di comercio y industria: M. de Cuba (ATSA), E. Arends y M. Roos (Camara di Comercio), D. Mansur, H. Timmer y M. Kuiperi (ATIA). Como secretario di e delegacion: J. Wever. Hecho ta cu ta danki na e vision y determinacion di nos Libertador Betico Croes nos pais por a conoce un union asina grandi den e delegacion aki.

 

Viahe di delegacion pa Hulanda

E delegacion a viaha pa Hulanda riba e dianan 3 y 4 di September 1977 den dos grupo y a regresa riba 16 di September 1977. Na Hulanda e miembronan di e delegacion a delibera tocante e futuro estatal di Aruba cu representantenan di Gobierno Hulandes. E meta principal logra door di e delegacion Arubano tabata cu e mandatarionan Hulandes porfin a cambia nan pensamento negativo pa cu e lucha di e pueblo Arubano. Esaki tabata e prome biaha cu e concesion aki a wordo logra na Hulanda. Tur esaki como consecuencia di e lucha di un pueblo decidido cu a para firme durante e accionnan di Augustus Scur

Pues recapitulando, e accionnan di Augustus Scur di 1977 conhuntamente cu resultado di e viahe di e delegacion Arubano tabata instrumental pa Aruba logra haya oido cerca Hulanda y cu finalmente a desemboca den e Conferencia di Mesa Rondo na maart 1983, caminda a acorda cu Aruba ta haya su Status Aparte entrante 1 di januari 1986. Union di henter un pueblo a crea e presion necesario pa por a logra e meta final aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio