Cu e rapport recien di Unicef a keda prueba cu derechonan di mucha na Aruba ta wordo viola, algo cu ta totalmente inaceptabel. 1 di cada 10 yamada na Telefon pa Hubentud ta relata na abuso domestico y/of sexual, y apesar cu a papia hopi riba combatimento di e abuso aki, de facto no mucho a wordo haci den e ultimo añanan. Di otro banda e castigonan den caso di abuso sexual ta varia hopi y den gran mayoria di caso, nan ta demasiado abao.
Nos hobennan a wordo neglisha den e ultimo cuatro añanan. P’esey den e vision di MEP cada mucho lo wordo poni central, y desde eynan nos lo atende cu e problema di muchanan neglisha y abusa. Na unda tambe henter e famia lo haya e atencion debido.
Nos lo combati abuso sexual di menor cu mas determinacion, door di logra castigonan mas severo pa e abusador sexual. Pa logra esaki nos lo tuma e siguiente pasonan:
PROTOCOL:
Introduci un protocol estricto den caso di abuso sexual di menor y pa brinda miho proteccion na muchanan y sosten na e victima y su famia, y concientisa nos comunidad cu e tipo di abusonan aki no ta aceptabel y ta wordo castiga severamente; evalua leynan existente pa introduci castigo mas severo den caso di abusonan sexual contra menor.
ACUMULA PRUEBA:
Percura pa un vertrouwensarts, specialistanan disponibel 24 ora pa dia, 7 dia pa siman, pa tuma e pruebanan di abuso sexual; percura pa suficiente material (“rape-kits”) pa tuma e pruebanan.
INVESTIGACION:
Fortifica KZP cu mas personal, entre otro trahado social y material pa investigacion di casonan di abuso sexual wordo haci efectivamente.
CASTIGO:
Bin cu castigonan mas severo contra abusadornan, entre otro castigonan minimo.
MEP ta consciente cu nos mester cambia e rumbo aki. Nos ta reconoce e importancia di tratadonan internacional y lo traha pa implementa nan cu determinacion pa nos muchanan no pasa mas den abuso cu lo marca nan pa bida largo.
MEP den gobierno lo ekipa y reforsa tur e departamentonan pa nan por eherce nan tareanan
manera debe ser, y por duna asistencia social na esnan cu tin mester, inmediatamente.
Nos vision ta e solucion pa combati abuso sexual di menor di edad. Dia 22 di September benidero, deposita bo confiansa den nos pa asina hunto nos logra e cambio y pone cada mucha central atrobe. Hunto nos ta logra. Ban p’e cambio sin miedo.