Home Uncategorized Tiroteo entre autoridad y un gang di 4 persona local, despues di...

Tiroteo entre autoridad y un gang di 4 persona local, despues di un persecusion cu caba na Bushiri

SHARE

Palm Beach, Bushiri: Diasabra den oranan di marduga algo pasa di 3’or un unidad di recherche ta topa cu un pelea den Hotzone, ariba parkeer plaats di The Village.

Persona cu arma di candela den su poder

Na e mesun momento nan ta constata cu un di e personanan envolvi, lo ta den posesion di un arma di candela. E persona aki a logra bandona e sitio den un Nissan Cube blanco, cual a sali cu velocidad halto bay direccion zuid, mesora e recherchenan a pidi pa refuerso.

Maniobra y manda auto riba polis
Na altura di luznan di trafico di Superfood, na prome instante e la para pa e luz cora tras di un auto, pero na momento cu ela ripara cu tin algun patruya yegando mas cerca di dje, ela sigui core y den su ansha e la maniobra cu su auto y a manda e auto ariba e polisnan. 
 
Persecusion a start
Ela sali bay direccion rotonde Sasaki, ela sigui  y drenta Schotlandstraat, bay zuid, mientras tanto diferente unidad di polis tanto uniforma y no uniforma tabata siguiende e auto aki. 
Na altura di Banjolux nan a kita bay links, pues ariba e caminda di tera patras di go kart nan a sigui bay ariba
 
Tironan a cuminsa cay
 
Mas pariba riba e caminda di santo aki, ocupantenan di e Nissan Cube a cuminsa los tiro ariba e polisnan. Mesora autoridad no a duda y tambe a cuminsa los varios tiro bek ariba e Nissan Cube.
 
Casi na final di e caminda e polisnan ta logra para e auto y ta detene tur 4 persona den e auto, cu ta trata di tres homber y un muher
 
Ambulance ta wordo pidi cu urgencia. 
 
Ambulance a wordo pidi cu urgencia na e sitio, paso tawata mustra cu un di e ocupantenan lo a ricibi un tiro pero despues e sospechoso mes a bisa polis cu e bala lo a rasca su curpa bay. No ta conoci con serio e herida tawata, pero asina mes ela wordo transporta pa hospitaal. 
 
Polis a  transporta e otro sospechosonan pa warda di Shaba, entre nan un dama cu tambe tabatat den e auto hunto cu e otro 3 hombernan , riba un di e imagennan por mira ora polis a hibe Warda di Shaba. 
 
Tur esnan envolvi ta personan local.
 
Locual a pasa den oranan di marduga nos mester para keto un rato y realisa cu cos a cambia, cu nos cayanan no ta sigur mas y cu cualke persona di cualke edad, por ta den posesion di un arma di candela of den cualkier auto of cas por tin un arma di candela y un tiro cu sali for di e arma ey por tin consecuencianan fatal cune.
Tur cuater persona den e auto tabata hendenan local, e grupo aki a falta tur clase di respet pa autoridad, mirando cu nan  a los varios tiro ariba auto di polis. Nan sa bon cu por tabata tin un posibilidad cu den e tiramento aki un di e tironey por a alcansa un di e agentenan tambe y nan sa bon cu polis lo los tiro bek riba nan cu tambe por tabata tin consecuencianan fatal pa nan, imagina un cuidadano cu ta cana sin arma pa defende su curpa.