Home Uncategorized MEP: Exitoso actividad di Amy Richards ‘Duna Sin Miedo’!

MEP: Exitoso actividad di Amy Richards ‘Duna Sin Miedo’!

SHARE

Diasabra siman pasa a tuma lugar na Cede di Ady na Savaneta, e actividad di candidato hoben ariba lista di MEP, Amy Richards. 
E meta social tras di e actividad aki tabata pa motiva e comunidad pa contribui cu comestibles, paña y productonan di higiena pa por traha pakete pa duna famianan den necesidad. Amy a expresa cu “Door di crea un movecion asina, nos por mira e union cu ta biba den nos comunidad y e solidarismo cu ta haci nos pais fuerte!”.

Hopi persona a reacciona riba e yamada pa forma parti di e movecion positivo aki. Como muestra di su aprecio, Amy a regala cada persona cu a haci nan donacion, un mata pa asina por representa un desaroyo positivo creciente.
Durante e actividad “Duna Sin Miedo” tabata tin entretenimento pa e muchanan y tambe nan a gosa den e Dino jump. Tabata tin sopi gay y sopi seafood pa tur presente, al estilo di un berdadero fiesta Arubano. 

Den nomber di Amy Richards y henter su team, un danki na cada persona cu a contribui y forma parti di e movecion aki. 
E trabounan pa reparti e paketenan pa famianan den necesidad a cuminsa caba den bario di Sabana Basora y San Nicolas y lo continua den otro barionan rond di nos isla.