ORANJESTAD.- Enseñansa ta e motor di cualkier sociedad prospero y ta conduci na desaroyo social y crecemento economico. Tanto e alumno como e maestro merece di forma parti di un sistema di enseñansa unda excelencia, calidad y desaroyo continuo ta e base di tur decision. Ta p’esey den e proximo periodo di gobernacion, POR lo incorpora un sistema di calidad den enseñansa cu ta encera, entre otro, introduccion di un sistema di evaluacion di nivel na tur scol, mehora prestacion y motivacion di maestronan, cumpli cu necesidadnan infrastructural, modernisa curiculo y expande orario di scol. Tambe, bin cu un solucion rapido pa e problema di drop-outs, mehora conexion entre enseñansa profesional y mercado laboral, crea oportunidad igual pa tur alumno mediante enseñansa gratis y reforsa Departamento di Enseñansa.
POR lo incorpora den e forma di traha na tur scol un sistema di calidad pa medio di un programa di garantia di calidad (“Quality Assurance Program”). E programa aki ta encera un proceso continuo, unda a base di indicadonan clave di rendimento (“Key Performance Indicators” of KPI) e scolnan mes hunto cu nan directiva ta midi y evalua periodicamente si nan ta cumpli cu realisacion di e metanan di calidad. Tambe nan ta identifica y analisa e factornan cu ta stroba realisacion di e metanan, ta tuma accion corectivo y ta raporta periodicamente na Inspeccion di Enseñansa encuanto cumplimento cu e programa di garantia di calidad.
Introduccion di e programa aki mester bay man den man cu implementacion di un programa di inspeccion di calidad. Elemento principal di esaki ta: fortifica Inspeccion di Enseñansa pa e departamento por cumpli debidamente cu su tarea di percura pa calidad halto di enseñansa. Lo haci esaki pa medio di un sistema pa monitorea cumplimento cu e programa di garantia di calidad, unda colaboracion entre e scol, directiva di scol, Departamento di Enseñansa y Inspeccion di Enseñansa lo ta estrecho. Periodicamente cada scol lo haya bishita di e Inspectornan di Enseñansa cu ta tuma accionnan pa mehora e calidad di enseñansa na momento cu esaki ta necesario.