ORANJESTAD, Aruba: Recientemente a tuma luga e prome evento di Balon di Oro aki na Aruba, unda cu tabatin diferente nominado di diferente categoria den e deporte rey di futbol. Pe evento por a tuma luga Ministro di Deporte Dr. Alex Schwengle, Stichting Fundacion Lotto pa Deporte y Arubaanse Voetbal Bond a brinda sosten na Stichting Futbol Aruba.
Durante e anochi aki a reconoce e futbolistanan, e talentonan den futbol cu Aruba tin y e evento a bay bon. Presidente di Stichting Fundacion Lotto pa Deporte, Sr. Di-Stefano Wernet RA a indica cu nan ta e prospectonan pa stimula pa sigui crece den e deporte rey. E deporte aki no ta solamente di team pero di respet, sacrificio y disciplina.
E ganado di e Ballon D’or a resulta Devis Oliveros (Nacional), mientras cu e dos nominadonan pa e premio tabata Paul Nickenson (Dakota) y Luis Estrada (Britannia).
E “Golden Glove” a bay pa Lionel Kaarsbaan (Britannia) mientras cu e demas nominadonan tabata Eric Abdul (Dakota) y Jose Cruz (Nacional).
E “Dream Team” di Aruba ta Lionel Kaarsbaan (Britannia), Miguel Guitierrez Lopez (Britannia), Chito v/d Biezen (Nacional), Paul Nickenson (Dakota), Rensly Tromp (Nacional), Jeamir Howell Brokken (RCA), Luis Estrada ( Britannia), Valdo Leocadio (Nacional), Kenroy Ranger (Nacional), Devis Oliveros (Nacional) y Ricky Hodge (Dakota)
E miho goleadornan den division di honor a resulta Devi Oliveros (Nacional) cu 22 gol anota y Marlon Andrea di Real Piedra Plat den division 1 cu tambe a anota 22 gol. Den division 2 e goleado ta Anthony Arends (Real Koyari) cu 13 gol, Div. Damas: Milvienne Henriquez (RCA) 48, Div. Junioren: Jean Pierre v/d. Linden (RCA) 12, Div. Mayor: Keano Maduro (Britannia) 21, Div. Menor: Thionne Oduber (Britannia) 21,
U13: Jaydon Dania (La Fama) 32, U11: Evander Nedd (Estudiantes 1) 43, U9: Vince Ramada (United 1) 45,
U7: Andre Ras (Britannia 1) 20 y di U5: Jayron Aparicio (RCA 1) 43.
Pa cu e evento aki Stichting Fundacion Lotto Pa Deporte lo sigui sponsor, pasobra nan tin un partner nobo cu ta Stichting Futbol Aruba. “Hunto cu Arubaanse Voetbal Bond y cu Ministro di Deporte, nos lo sigui traha riba e proyecto aki”, Sr. Di-Stefano Wernet RA a duna di conoce. E proyecto aki ta uno nobel y e ta un proyecto na bienestar di deportistanan. “Pe motibo aki Lotto pa Deporte t’ey”.
Na momento di cuminsa cu un iniciativa nobo, mester planifica di cual tin momentonan cu cosnan por ta bayendo bon of malo. El a tuma su tempo pero na final hunto cu tur partner a logra keda cla cu tur cos pa asina por tabata tin e evento di Balon di Oro. Pa otro aña Stichting Fundacion Lotto Pa Deporte ta kere cu lo mester haci mas grandi y nan ta contento con Futbol Aruba tin nan estadistica pasobra na final di dia ta cifra ta conta. Durante e torneo mester mira e datonan pa asina por premia e sacrificio, presentacion di e bon futbolistanan.