Diabierna dia 25 di Augustus Aruba Certification Program tabata tin e placer di por a entrega certificado di nan programa na un grupo di cuerpo di aduana cu a sigi e curso di Aruba Certification Program.
Aruba Certification Program, conhuntamente cu ATA y Aduana a colabora pa asina e cuerpo di aduana, especialmente e grupo cu a sigi e curso aki cu ta den contacto directo cu nos bishitantenan pa asina nan por brinda informacion corecto y consistente, tanto na nos aeropuerto como na e diferente hafnan unda nos cuerpo di aduana ta presente.
Tabata sumamente importante y valioso e diferente experiencianan cu a wordo intercambia, entre e facilitadornan di e programa y e grupo di aduaneronan. Diferente informacion tocante e experiencia cu bishitante a wordo intercambia, pero tambe puntonan di mehoracion a ricibi atencion debido di Aruba Certification Program como tambe di ATA.
E sesionan tabata hopi dinamico, interactivo y informativo na unda e participacion di cuerpo di aduana tabata energetico y dedica.
Un palabra di danki na gerencia di aduana cu a brinda Aruba Certification Program e espacio pa por a ofrece e curso. Un danki ta bai tambe na ATA como patrocinador di e Aruba Certification Program. Un palabra di pabien y danki ta bai specialmente tambe na cada un di e aduaneronan cu a participa cu tur nan entusiasmo na e curso.
Aruba Certification Program ta orguyoso di por a forma parti na e sesionan cu a caba di tuma lugar y tin tur confiansa cu e proximo sesionanan cu cuerpo di aduana lo ta mes exitoso.
Un invitacion special ta bai na nos comunidad pa bishita e website di cuerpo di aduana pa por keda informa di tur rekisito cu mester tene na cuenta ora di biaha.