ORANJESTAD, Aruba: Cabesante y directornan di scolnan publico a reuni hunto pa asina atende cu diferente topico. Topiconan aki ta importante pa asina yuda mehora e sistema di enseñansa. Cabesante y docentenan di scolnan publico ta di pensamento cu mester keda haci encuentronan aki pasobra hopi punto importante ta bin dilanti.
Cabesante Scol Primario Kudawecha, Xiomara Berkel ta haya cu loke Dienst Publieke Scholen (DPS) a haci dialuna ta mustra cu nan tin un aprecio pe cabesantenan. Pero tambe nan tin horea pa scucha con e aña a bay. E deseo di Xiomara Berkel ta pe proximo aña escolar tur cos por bay, pero tambe cu e y su team di maestronan por saca lo maximo di e studiantenan cu nan ta duna les. Tambe cu e cooperacion di e mayornan y DPS.
Ta hopi importante cu scolnan semper ta bini hunto como DPS di cual e departamento no ta hopi scol. Directora di Julianaschool, Paula Paula a splica cu no ta tur ora nan ta topa otro y p’esey e tipo di encuentro asina aki ta sumamente importante como informacion, cambio di informacion y tambe e celebracion hunto. Pe aña escolar directora di Julianaschool tin hopi idea cual aworaki nan ta na Piedra Plat Entertainment Center y nan mester a haci cierto ahustacionnan. “Nos desea ta cu mas pronto cu ta posibel pa nan cuminsa traha riba renobacion di nos scol pa nos por bay bek eynan”, Paula Paula a expresa. Tur deseo cu tin na Julianaschool ta na bienestar di e studiantenan unda cu nan por duna les trankil y tur hende haya tur material cu nan mester.
Durante henter e aña escolar na Scol Paso pa Futuro hopi cos interesante a pasa y cabesante di Scol Paso pa Futuro, Zelda Steenen a expresa cu aña pasa nan a manda muchanan di Grupo 7 pa scol avansa, esta SPO. Mas o menos 9 pa 10 di e muchanan aki a logra drenta EPB Hato y esey ta un logro hopi grandi pa Scol Paso pa Futuro. “Na final di aña escolar cu awo mas mucha a bay EPB. Esey pa mi ta un satisfaccion”, Zelda Steenen a remarca contento. Desde cu Zelda Steenen ta traha den enseñansa special, semper tin e pensamento cu un mucha por mas. Maestronan mester pusha e studiantenan y saca afo nan maximo potencial pa asina nan por logra hopi den nan bida. Un di e cosnan positivo cu e scol tin ta e sistema di mocca, cual ta un sistema cu esnan cu ta desea por haya les via internet unda cu tur cos ta visual pe muchanan y ta mas facil. Deseo di e scol ta pa traha riba e speelplaats aunke cu nan ta basta leu caba pero e directora falta un cos chikito pa regla y asina cu aña escolar cuminsa e muchanan lo hay’e bunita.
Cabesante di Colegio Conrado Coronel, Lourdes Vries ta haya cu loke a sobresali den e team ta e amor pe trabou di e coleganan. Por a tambalia un tiki pero e coleganan a pone schouder hunto pa yuda y planea pa por sigui y termina cu exito. Colegio Conrado Coronel pa añanan ta un scol multilingual, unda cu desde kleuterschool te cu 5de klas muchanan ta haya les na Papiamento cual ta un piloto cu a bay hopi bon. Pero e aña escolar nobo e piloto aki lo sigui te cu 6de klas, unda cu por mira den e klasnan
abou hopi exito. E muchanan ta progresa bon y nan tin mas curashi, unda cu nan ta hunga comedia dilanti klas, nan ta siña mas sistema pa evaluacion cu ta solamente e toets riba papel. E vocabulario di e muchanan den Papiamento tin ora ta miho cu adulto. Tin mayor ta acerca e scol y ta bisa nan esaki. Lourdes Vries a desea tur mucha den 6de exito pe proximo aña escolar y tin cosnan cu ainda nan mester drecha pa cosnan ta bon den 6de y nan a ricibi tur yudansa cu nan tabatin mester.