Tanki Flip – Diasabra atardi, den careda di 6:50 polis a wordo pidi na Tanki Flip, na un cas cerca di e oficina di e veterinario.
Motibo tawata cu un señora den e vecindario a wak tres Pitbull drenta un cas y mes ora a avisa polis.
Polis a yega hopi lihe y por a premira cu lo bay tin problema, mirando e size di e Pitbullnan y ariba dje nan a drenta den e cas.
Dado momento nan a ataca e cacho bieu di e cas, gritamento y adrenalina a start pa pueba stop y trata nan sacanan pafo, prome algo otro pasa.
Un dama y su welo, tawata na e cas y nan lo ta doñonan di e cachonan, cu segun nos a compronde nan a sali ora e cabayero di edad lo a bay muha mata.
E dama den e pelea hunto cu e agente policial a trata na stop e bringamento, cu tawata den e sala cu no tawata mucho grandi, indicando cu cos por a bay hopi robes mes.Mirando cu na e adres ta biba un señora di edad, cu no tawata ni mucho na altura di kiko tur tawata pasando.
Polis mirando cu e animalnan cu tawata tres, tawata tin e cacho teni y cu tawata teme pa su mes y esnan rond ta los un tiro matando asina un di e animalnan.
E otronan asina mes a sigui bringa y eynan ora e cabayero di edad cu ta un persona enfermo di salud a drenta y yuda su nieta. Ey ta caminda cu a logra kita un y net e ora yiu di e cabayero di edad a yega.
Mes ora ela hinca e prome pitbull den auto patras y a bay paden busca e otro y tambe ta carge hinca den e auto patras. Por a wak nan cara y boca na sanger y tambe nan tawata hopi cansa caba. Den e sala a keda tur na sanger y tambe cosnan a wordo kibra.
Pues un caso sumamente lamentabel pa ambos banda y tambe pa e agente policial cu mester a actua den un split second.
Loke a pasa nos no ta punta dede y ni culpa niun hende. Un descuido cu e animalnan a haya e porta habri y mes ora nan a sali.
Pakiko nan a bay net e cas eynan no ta mucho duidelijk, mirando cu segun nos di unda nan a sali ta hopi mas panort.
Hopi hende tin of tawata tin Pitbull, pero loke a pasa ayera diasabra y den un sala chikito cu 4 cacho bringando no ta nada facil pa deal cune y sin pensa cu e por a caba den e tragedia si e bestianan ey a dicidi di bay ataca un ser humano tambe.