“Canando den pueblo mas y mas mi a bin ta scucha e clamor cerca hopi hende cu placa no ta yega mas. 6 di cada 10 adulto cu ta biba na Aruba ta biba bou di e asina yama “minimo de subsistencia”, cual ta e nivel di entrada basico cu un persona mester tin pa e por hiba un bida decente. E cos aki no por!”. Na palabra, lider di POR, Otmar Oduber, kende cada dia ta mas y mas preocupa pa e situacion economico di hopi famia na Aruba. Ta p’esey POR lo introduci un Revolucion Economico na Aruba, cu lo tin como efecto inmediato, aumento di e poder di compra di e ciudadano y reforsa e posicion di clase medio, cual ta weso di lomba di comunidad Arubano, di acuerdo cu Otmar Oduber.
Parti esencial di e Revolucion Economico ta reforma di e sistema fiscal di Aruba. Den e reforma aki lo reduci e impuesto riba salario (loonbelasting) y e impuesto di entrada (inkomestenbelasting), di manera cu e ciudadano ta retene mas placa na momento cu e cobra.
Banda di esaki, ta intencion di POR pa aumenta salario minimo di trahadornan. Pero esaki no por sosode di forma descabeya, manera a sosode ultimo tempo. Otmar Oduber ta splica cu subida di salario minimo lo bay acompaña pa reformanan fiscal pa e doño di trabou, den sentido cu lo reduci e costo relaciona cu haci negoshi na Aruba . Di e manera aki por aumenta salario minimo di un forma responsabel, sin cu e ta stroba hacimento di negoshi na Aruba.
Banda di simplifica e sistema di impuesto directo pa indirecto di nos isla, lo revisa tambe e sistema di deduccion (aftrekposten). Ademas, lo elimina impuestonan cu no (of minimalmente) ta contribui na caha di gobierno y uza e recursonan cu ta bin liber pa mehora e control riba cumplimento cu nos leynan di impuesto. “Tur esaki den cuadro di e intencion firme di POR pa trece nos pueblo na un nivel di bida husto, unda un y tur por biba feliz riba nos dushi Aruba. Pasobra, hunto, nos por!”, Otmar Oduber a finalisa bisando.