ORANJESTAD, Aruba: Pa prome biaha, nos Team U-17 Damas lo representa Aruba den e campeonato di futbol U-17 di FIFA. E team a biaha pa St. Lucia compaña pa nan Coach Reynhard Breinburg y representante di e team Isabelle Netto. E preparacionnan a cuminsa den luna di Maart. Durante 5 luna y mey e team a train basta duro pa e torneo aki. Segun Breinburg, tabata un preparacion basta dificil ya cu tabata tin e “play-off” y tambe e periodo di vakantie. “Pero mi ta kere nos ta bay bon prepara”, el a expresa.
E emocionnan ta halto y ta varia. Ta un team di muchanan cu nan edad ta varia cuminsando entre 12 pa 16 aña. “Nos mester mira kico ta bay topa ayanan. Si tur mucha muhe ta 16 aña, con nan forsa ta, con e weganan ta bay ta”, el a bisa. Traha como un team ta hopi importante, segun Coach Breinburg.
Banda di esaki, Isabelle Netto a indica cu e team a train dos biaha pa siman y asina nan a prepara pa nan biahe pa St. Lucia. “Nos a bira manera un famia”, Netto a manifesta. Na St. Lucia nan lo hunga un par di wega pa e clasificacion pa e mundial di FIFA. Pa cu esaki nan ta hopi orguyoso di por a haya e chens. “Nos ta bay pa gana, pa e amor cu nos tin pa e wega, p’esey nos ta haci nos best y haci lo mas posibel pa yega leu”.
Minister di Salud, Deporte y Cuido di Nos Grandinan, Dr. Alex Schwengle tabata na aeropuerto pa despedi e hobennan y el a bisa cu “Nos t’ey pa desea nan hopi suerte y hopi exito na e competencia. Nan a train pa hopi luna largo. Durante 5 luna nan a haya un training basta pisa, tanto mentalmente como fisicamente, pa por ta bon presenta y representa Aruba hopi bon”. E mandatario a indica cu ta spera cu e team por haci un bon trabao pa asina logra un posicion den e campeonato na 2018.