Pueblo di Aruba, e asunto di investigacion y detencion di minister sr. Paul Croes, a pone Aruba bao di un luz negativo den tur sentido di palabra. Na Aruba mes, pueblo ta puntra dicon sr. Croes ta riba non actief, pero ta cobrando su salario si, pues cobra sin traha. No pa papia mes di e fraude y corupcion cu minister Croes ta acusa di nan. Tambe pueblo ta puntra unda PM Eman a keda cu su declaracion den tur e escandalo aki di Eman su colega di partido y gobierno? Dicon PM Eman no a bini padilanti y bisa cu minister Croes ta inocente? Di otro banda ta reina un alegria grandi den pueblo cu pa prome biaha den historia di país Aruba, un minister sospecha di corupcion y fraude ta wordo deteni. Seguramente y particularmente ya cu ta trata di AVP, pasobra den pasado varios caso di corupcion y fraude a tuma lugar di parti AVP y niun di nan a cay cera. Manera Beta Hotel, Radisson y Fondo Desaroyo San Nicolas unda AVP a horta 50 miyon florin. Solamente tabata tin interogacion cu handschoen di felpa y cu un trato di 5 strea di parti husticia na Aruba.
E berguensa Berde aki no a keda solamente den cas, pero a wordo exponi tambe na mandatarionan Hulandes. Muy en particular na parlamentarionan Ronald van Raak y Andre Bosman.
Mi a logra haya e contestanan na e preguntanan cu mi a haci na nan. Mi a puntra nan si Tweede Kamer tabata envolvi den e investigacion contra minister Croes di AVP. Tur dos a contesta mi separadamente cu no. Pero nan partidonan SP y VVD a haci peticion pa haci investigacionnan riguroso pa saca afor e relacionnan cu e baho mundo tin cu politiconan. Na Corsow (Schotte) y na St Maarten varios politico a wordo investiga y sentencia y nan ta compronde cu tin mas detencion ta bay cay e.o. na Aruba tambe. Mi a puntra nan kico nan ta pensa di cu e minister ta non actief pero ta ser investiga penalmente door di husticia di Aruba? Aki tur dos a contesta mi cu e mesun mensahe cu na Hulanda esaki no ta posibel y cu na ningun pais civilisa y decente, esaki tampoco lo ta posibel. Tambe nan a enfatisa cu ta incomprendibel con sr. PM Eman a keda pone man riba cabes di su colega Paul Croes. PM Eman mester a distancia su mes publicamente di sr. Paul Croes y bin padilanti y responsabilisa su mes pa e caso aki. Di lo contrario PM Eman ta perde tur su credibilidad segun nan. Algo cu no a pasa pasobra sr. Croes tabata hasta campaña y expone su mes publicamente den AVP recomendando coleganan riba lista di AVP. Finalmente, mi a puntra nan con nan como parlamentario ta opina di e detencion di minister Paul Croes. Como contesta mi a haya cu nan ta contento (mescos cu hopi na Aruba) cu husticia a cuminsa trata cu politiconan cu ta wordo sospecha di corupcion. Esaki ta sumamente necesario pasobra tanten cu bandidonan ta goberna na Aruba, lo no ta bay tin un futuro miho pa e pueblo.
E contestanan cu nos a haya di e parlamentarionan Hulandes ta indica claramente cu AVP ta un partido cu ta complaciente na corupcion y fraude. Cu nan lider no tin credibilidad y no por maneha.
Pa nos pueblo esaki ta significa tambe un “stem advies” cu nos no por vota pa AVP tampoco. Atrobe ta keda na e pueblo di Aruba pa haci uzo di tur locual ta sucediendo den gobernacion di AVP, pa husga y dicidi miho con pa vota dia 22 september venidero. Manera mi a bin ta bisa “pa AVP nunca mas te den siglo di siglonan”. Karel Maduro nr 19 riba lista di partido MEP.